- O Mecalia non se fía do pechacancelas e quere empezar con bo pé o seu cargado novembro
Até o máis longo dos camiños comeza cun primeiro paso. É o que vai dar o Mecalia Atlético Guardés para afrontar un frenético mes de novembro con cinco encontros en apenas 16 días. Unha tolemia por cantidade e tamén por calidade, porque as xogadoras de José Ignacio Prades veranllas dúas veces co Besançon na Q3 da European League e polo medio enfrontaranse ao Bera Bera e o Rocasa Gran Canaria, primeiro e segundo clasificado da liga, respectivamente. Pero antes de todo iso, o equipo miñoto visita Lanzarote este sábado para medirse ao Balonmano Zonzamas (20:30, hora canaria; 21:30, hora peninsular).
Faio co orgullo ferido tras a súa cruel derrota da semana pasada en Xixón cun gol a portaría baleira no último minuto e coa ansia de recuperar sensacións e puntos. En fronte estará o equipo canario que, a pesar de ser o pechacancelas e non sumar puntos aínda, ofreceu cousas interesantes no que vai de curso.
O equipo de Lanzarote ten xogadoras con experiencia como Susi Sánchez ou Gleinys, que deron o punto de calidade e madurez a un grupo novo, cun balonmán moi dinámico e veloz, que xa lle puxo as cousas difíciles a colectivos de tanto renome como Granollers ou Elxe.
O Guardés viaxou hoxe sábado
O Mecalia Atlético Guardés voaba hoxe o sábado á primeira hora desde Lavacolla nunha conexión directa con Lanzarote. Unha viaxe longa, o primeiro a Canarias desta serie de cinco partidos xa que o equipo do Baixo Miño visita Gran Canaria o mércores día 17.
Este desprazamento a Lanzarote o Mecalia At. Guardés faino co posto. José Ignacio Prades leva ás 13 xogadoras dispoñibles do primeiro equipo miñoto. Son ausencia as consabidas baixas das brasileiras Tamires Anselmo e Hannah Nunes. Si entraron na lista Sandra Santiago e Paula Arcos, que acabaron rengueantes o partido de Xixón tras moitos minutos fóra da pista por senllos golpes. No caso da internacional alacantina, o impacto na zona lumbar dificultoulle a semana de adestramento. Pero, co paso dos días, ha ir mellorando e o sábado poderá axudar ás súas compañeiras dentro da pista.
O partido de Lanzarote será o disparador dun calendario frenético, con partidos cada tres días. O vindeiro mércores, o líder visita A Sangriña. Guardés e Bera Bera veranse as caras en duelo adiantado da novena xornada pola disputa da Q3 da liga Europea por parte de ambos os equipos.
Precisamente a ida desa eliminatoria xogaraa o equipo miñoto na cidade francesa de Besançon o sábado 13. O mércores 17, de novo a Canarias para enfrontarse ao Rocasa.
E o maratón conclúe o domingo 21, coa volta da competición europea fronte á escuadra gala. O primeiro paso da carreira, como deciamos ao comenzo, será hoxe sábado 6 de novembro na pista do BM Zonzamas ás 21:30 (hora peninsular). O partido poderá seguirse a traves da canle de YouTub do club local: Youtube do Zonzamas.
José Ignacio Prades: “O equipo xa sabe o que é levar ao lombo estas semanas tan cargadas”
