O Atlético Guardés apura as horas dentro e fóra da pista para que todo estea a punto para o comezo da liga Guerreras Iberdrola 2020-21 na Sangriña. Co protocolo da instalación deportiva elaborado polo Concello da Guarda e segundo a normativa autonómica, esperábase a presenza de como máximo 300 afeccionados nesta data de debú ligueiro. Pero a incerteza dunha pandemia que cambia o devir en cuestión de horas levou á Directiva da entidade, tras as novas restricións da Xunta de Galicia para o Baixo Miño, a acordar por unanimidade que o partido de contra o Lanzarote-Puerto del Carmen (sábado, 12 de setembro, 20:30 h) se vaia celebrar a porta pechada.
A Xunta Directiva do club, en permanente contacto co Concello da Guarda, tomou esta decisión “dolorosa e difícil” tendo en conta “a evolución epidemiolóxica e as novas restricións sanitarias marcadas para A Guarda”.
Directiva do Atlético Guardés: “Coidémonos entre todos, para poder volver a desfrutar xuntos pronto”.
O club realizou “un necesario exercicio de responsabilidade individual e colectiva e sentido común”, o único que se entende nesta situación “por respecto ás nosas deportistas, persoal e socios da entidade”.
A entidade lanzou unha mensaxe: “Coidémonos entre todos, para poder volver a desfrutar xuntos pronto”.
A Sangriña acolleu a realización de probas de detección de COVID-19 ás xogadoras, corpo técnico e staff do club que hoxe sábado formará parte do desenvolvemento do partido contra o Lanzarote. Todas as probas resultaron “negativas” e notificouse aos Servizos Médicos da Real Federación Española de Balonmán, tal e como require o ente federativo para esta primeira xornada.
Puerto del Carmen, o rival do Guardés
Precisamente contra o Lanzarote – Puerto del Carmen, recentemente chegado á categoría dirixido por Miguel Ángel Lemes e coa central ex do Guardés Rosa Álvarez nas súas filas, buscarán a súa primeira vitoria do curso as pupilas de Prades.
O equipo insular tamén se viu afectado as restricións derivadas do COVID-19 tendo que, tal e como contan desde o club, “traballar na rúa ou con grupos reducidos de dez persoas” até o pasado martes. A súa preparación na pretemporada estivo marcada pola participación na Copa Gobierno de Canarias, mentres que o Guardés disputou dous amigables contra o Aula.
Neste primeiro partido serán baixa por parte do Guardés: África Sempere, Martina Mazza, Rosario Urban e Sarah Valero; mentres que o Lanzarote non poderá contar coa pivote Kenia Hernández (lesionada) e a extremo arxentina Cati Benedetti, quen non puido aínda viaxar a España.
A expedición do CB Lanzarote Puerto del Carmen tiña previsto viaxar a primeira hora de hoxe (sábado 12), tendo previsto desprazarse ás 07:00 horas a Gran Canaria e desde alí coller un enlace a Santiago de Compostela. O equipo chegará a terras galegas sobre as 14:30 horas.
O partido do Atlético Guardés poderá seguirse en streaming:
