- O Mecalia Atlético Guardés deuse cita no Pavillón da Sangriña para empezar a traballar na pretemporada 2023/24.
- A adestradora do equipo da Guarda, Cristina Cabeza, estreouse dirixindo o primeiro adestramento do equipo miñoto, acompañada da técnica lusa Ana Seabra e do novo preparador físico, Iván Vázquez.
O Mecalia Atlético Guardés iniciou a súa fase preparatoria con dobre sesión de adestramento: pola mañá, con exercicios físicos; e pola tarde, en pista. Ao pavillón asistiu gran parte do bloque de xogadoras, fóra das fichaxes Sandra Radovic e Andreza Almeida, por asuntos burocráticos; e a paraguaia Pauli Fernández, que regresará aos entrenos a próxima semana. Tampouco puido estar Júlia Nuéz, que continúa recuperándose da súa lesión.
Si acudiron ao adestro as novas incorporacións: Cecilia Cacheda, Itziar Martínez, Estela Carrera, María Palomo, Ania Ramos, Nerea Solares e Blazka Hauptman. Tampouco faltaron a esta primeira toma de contacto as habituais: a capitá Míriam Sempere, María Sancha, Cristina Cifuentes e Elena Amores. Pola súa banda, a veterana África Sempere estivo na sesión matinal, pero non na vespertina por temas médicos.
O Guardés arrinca na Liga Guerreras en setembro
O equipo ten seis semanas por diante para preparar a tempada 23/24, que arrincará o próximo 2 de setembro con partido fóra de casa, en Villava (Navarra), contra o Beti-Onak.
Ata entón, a maioría dos entrenos seguirán o guion desta primeira xornada: pola mañá, de 10:00 a 12:00 horas, con prácticas físicas; pola tarde, de 18:00 a 20:00 horas, adestramento con balón en pista. As xogadoras descansarán un día entre semana e case todos os domingos. Os recoñecementos médicos terán lugar este venres.
Como parte da fase preparatoria, o conxunto miñoto xogará os días 25 e 26 de agosto o torneo Summer BAG Experience 2023 en Villacelama (León). O resto de partidos da pretemporada darase a coñecer nos próximos días.b
