- O colectivo de xogadoras que adestra Abel González manexou á perfección a ampla vantaxe conseguida o sábado sobre o conxunto neerlandés na eliminatoria da European Cup e asinou un segundo triunfo para o Mecalia Atlético Guardés que completaba así a súa festa de retorno á Sangriña.
O Mecalia Atlético Guardés cumpriu co seu deber e selou a clasificación para os oitavos de final da EHF European Cup. O conxunto miñoto volveu gañar ao Juro Unirek VZV neerlandés e completou o pleno de vitorias na eliminatoria tras deixar encarrilado o seu pase o sábado neste fin de semana europeo de inauguración da reforma da Sangriña.
E é que quince goles de vantaxe son moitos. Demasiados. O 37-22 do sábado deixara a eliminatoria moi encarrilada e ambos os equipos tomáronse o partido con certa calma, sabedores de que era case imposible voltear un resultado así.
A pesar de todo, o Mecalia Atlético Guardés esforzouse en regalar á súa xente outra vitoria para facer o fin de semana 100% inesquecible.
Tras un inicio con algunha dúbida, que provocou un tempo morto de Abel González, apareceu a velocidade ofensiva do equipo local, que volveu ser indetectable para as holandesas. As visitantes eran fortes no centro do 6:0 grazas á súa envergadura, pero demasiado lentas como para interromper a fulgurante electricidade de Pauli Fernández nas penetracións, de Patrícia Lima na dirección e de Sandra Santiago, de novo cun gran poder goleador, no lanzamento.
Na outra portaría, o argumento visitante eran os lanzamentos exteriores. Pero a gran profundidade defensiva local facilitaba o traballo á portaría. Con este devir dos acontecementos, o equipo miñoto foise ao descanso cunha cómoda vantaxe (12-17).
Á volta dos vestiarios, o Mecalia Atlético Guardés completou o trámite. Chegaron máis goles e o Juro Unirek VZV estivo 12 minutos sen anotar. A vitoria e o pase a oitavos estaban selados.
Mentres tanto, a bancada divertíase e gozaba do xogo das súas, da flamante remodelación da Sangriña e da actuación do grupo de percusión Aperta, que amenizou a festa antes e durante o descanso do partido. Co billete a oitavos, o Mecalia Atlético Guardés espera agora rival.
Sorteo da European Cup
A EHF (Federación Europea de Balonmán) anunciará nos próximos días a data do sorteo para a seguinte rolda da European Cup. Unha eliminatoria que se celebrará o próximo mes de xaneiro de 2023.
Abel González e o bloque de xogadoras que adestra xa están a desexar volver navegar por augas europeas e coñecer cal é o rival que lles axudica a sorte.
FICHA TÉCNICA
17) JURO UNIREK VZV (12+5): Eva van Stralen (p.), Maud Kruijer (4), Meike van Splunter (2), Pien van der Geest (2), Hua-Lu Kuilboer, Britt Stammes (2), Renée Kolken, Meike Kruijer, Lisanne Baker (p.), Romée Louwen (1), Lieke Jongejan, Maud Tamis (1), Jane Kramer (1), Anna Buter (2), Ilse Leijen e Lisa Hölscher (2).
35) MECALIA ATLÉTICO GUARDÉS (17+16): Marisol Carratú (p.); África Sempere (2), Sandra Santiago (4), Giselle Menéndez (4), Carolina Silva, Ángela Nieto, Pauli Fernández (3), Míriam Sempere (p.), Cris Cifuentes, Patrícia Lima (1), Celia García (2), Elena Amores (5), Carla Gómez (1), María Sancha (5), Júlia Nuez(3) e Daniela Moreno (5).
MARADOR CADA CINCO MINUTOS: 3-4, 7-7, 9-8, 10-11, 11-15,12-17 – descanso – 12-20, 12-24, 14-29, 15-31, 16-33, 17-35.
EQUIPO ARBITRAL: Miro Korja e Cristopher Metsämäki (Finlandia). Excluíron por dous minutos á xogadora Pien van der Geest (2), na banda do Juro Unirek VZV, e á deportista Carla Gómez (2), pola parte do Mecalia Atlético Guardés.
INCIDENCIAS: Partido de volta da terceira rolda da EHF European Cup disputado no pavillón da Sangriña na Guarda logo da súa remodelación.
