O Atlético Guardés soña con certificar mañá, domingo 21 de febreiro, no pavillón da Sangriña da Guarda ante o HC Galychanka (19:00 horas, TVG2) a súa presenza por primeira vez nas semifinais dunha competición europea. Arbitrarán o choque os colexiados lituanos Justas Ivanauskas e Edvinas Jencevicius.
O Club Balonmán Atlético Guardés ten unha cita coa historia e cos cuartos de final da EHF European Cup. O conxunto do Baixo Miño, un habitual na competición continental desde que conseguiu o ascenso a División de Honra Feminina, aínda non sabe que é xogar unhas semifinais en Europa, e quere que iso mude.
Tras conseguir a vitoria contra o HC Galychanka por 16-24, as xogadoras que adestra de José Ignacio Prades teñen 60 minutos por diante para certificar unha clasificación inédita que se poderá seguir a través das cámaras da Televisión de Galicia.
Por sorte, todos os que formarán parte do choque de mañá (planteis e corpo arbitral) confirmaron esta tarde o seu resultado negativo nas probas realizas para a detección de coronavirus COVID-19.
“Despois do partido do xoves (disputado en Valladolid), Paula Arcos e Patrícia Lima teñen molestias e serán dúbida até o final”, lamenta o técnico do Atlético Guardés, José Ignacio Prades, quen no que vai de tempada aínda non tivo oportunidade de poder gozar de todo da plantilla ao cento por cento.
Con estas dúas importantes dúbidas para a primeira liña, Prades recoñece que “iso fainos modificar a forma de xogar e a formulación”, ademais diso, e a pesar de contar cun colchón de oito tantos, o técnico insiste en que o seu persoal afronta con “cero confianzas” a volta dos cuartos de final da EHF European Cup. “Sabemos que son duras e é un equipo co que hai que facer as cousas igual de ben que en Ucraína”, afirma Prades.
Prades, técnico do Atlético Guardés: “Sabemos que son duras e é un equipo co que hai que facer as cousas igual de ben que en Ucraína”
O equipo ucraíno, xa hospedado en Oia desde esta madrugada, iniciou a súa viaxe o xoves seguindo a mesma ruta que o Atlético Guardés na súa viaxe a Leópolis: Leópolis – Istambul – Madrid e desde a capital de España en autobús até Galicia.
O HC Galychanka xa adestrou na Sangriña
O conxunto que adestra Andronov tivo a súa primeira toma de contacto coa pista da Sangriña esta tarde de sábado e mañá domingo, á primeira hora, volverá completar unha lixeira sesión de adestramento antes de que ao dez da mañá realícese a reunión técnica do partido.
“Virán esgotar todas as súas opcións de estar en semifinais, non teñen nada que perder”, comenta o técnico do Guardés, quen espera que as súas xogadoras entren “igual de serias e coa mesma intensidade que na ida”, expón.
“Vai ser duro sufrir durante sesenta minutos pero imos agarrarnos ao soño de estar en semifinais polo plantel, polo club e pola afección, que o ano pasado quedamos sen poder gozar dese fito histórico para todos”, anhela o adestrador Atlético Guardés.
- Para ver a retransmisión televisiva do partido pódese acudir á canle TVG2 e tamén á web da CRTVG:
- Nesta ligazón pódese tamén seguir en directo o partido
PLANTILLA DO HC GALYCHANKA UCRAÍNO
O Lokomotiva, xa en semifinais
O sorteo celebrado pola Federación Europea de Balonmán para os cuartos de final da terceira competición xa deixou ademais o cadro das semifinais que se disputarán entre o fin de semana do 27-28 de marzo e 3-4 de abril.
O HC Lokomotiva Zagreb é o primeiro clasificado para semifinais tras gañar ao DHC Slavia Praha nunha eliminatoria a dobre partido (30:25 – 27:31). As croatas medir ao vencedor do choque entre o Yalikavaksports Club turco e o Rocasa Gran Canaria español (domingo, 14:00 horas CET).
Pola súa banda, o Atlético Guardés, en caso de certificar a clasificación, medirase case con total seguridade ao Rincón Fertilidad Málaga. O conxunto de Suso Gallardo gañou onte na ida á AC PAOK de Grecia (30:21) e mañá domingo ten tamén a volta da eliminatoria (16 h CET), no mesmo escenario: Salónica.
