O Atlético Guardés disputou este mércores unha nova xornada da Liga Guerreras Iberdrola, co Zubieta Evolution Zuazo como rival. Despois dunha primeira parte gris, as galegas lograron a remontada na segunda metade, levándose a vitoria por un 25-27.
Nas filas do equipo de Prades, Marisol Carratú foi clave, asinando un 40%, e marcando o camiño cara o triunfo. A máxima anotadora entre as galegas, con 7 tantos, foi Carla Gómez.
De menos a máis
O equipo galego entrou atascado ao partido. As locais aproveitáronse da escasa fluidez visitante para golpear primeiro, cun 3-1 de saída. O dinamismo da súa primeira liña superaba ao 6:0 galeog pouco profundo, pendente de pechar as penetracións no seu final e non en orixe.
Malia os erros nos lanzamentos desde os extremos co xogo de Arcos coa liña, o Guardés sobrepúxose. Con catro tantos de Carla Gómez, e as asistencias da alicantina, cambiaron o tono nas miñotas.
Prades tratou de rotar o banco para dar saída a Miriam Sempere e Nazaret Calzado no sete inicial, deixando a seis efectivos máis na reserva. Cun plantel acusando a acumulación de partidos, o Zuazo aproveitou para acadar unha peligrosa vantaxe de catro goles no 9-5, con Bengoetxea como líder.
A reacción comezou con dous tantos consecutivos de Carla Gómez, e continuou coa entrada de María Sancha, que anotou outros dous goles e provocou unha falta en ataque, e terminou de perfilarse con Carratú.
A arxentina asinou a primeira das súas nove paradas antes do descanso para axudar a reducir a só un tanto a diferenza ante as locais.
Tras o descanso, a bonaerense foi un muro capaz de frear cada lanzamento, aportando tranquilidade ao Guardés.
As galegas puideron correr tras cada intervención da súa capitá, conseguindo ademais goles fáciles. Cun demoledor 1-9, as de Prades situábanse por diante cun 14-21 nos primeiros dez minutos tras a reanudación.
O Zuazo, lonxe de baixar os brazos, sacou o seu espírito guerreiro e pouco a pouco comezou a descontar goles do marcador. Entón, as visitantes tiraron de oficio e mentres a produción de Carratú continuaba, obrigando ás rivais a tirar desde os extremos, as xogadoras do Guardés mantiñan a súa xa lixeira vantaxe.
A falta de tres minutos as vascas puxéronse a dous goles, pero un tanto de Arcos, que pecharía a tarde con seis, pechou o encontro.
FICHA TÉCNICA
Zubieta Evolution Zuazo (13+12): Ezbida (p.), Ariadna González; Paula García, Estibaliz Velasco (2), Alba Sánchez (2), Isa Fernández-Agustí (5), Berasategi, Garoa (1), Ane Encina (3), Erauskin (1), Maddi Bengoetxea (7), Jone Aguado, Ari Blázquez, Anne Romero (1), Permach e Madi Fernández-Agustí (3).
Mecalia Atlético Guardés (12+15): Carratú (p.), Míriam Sempere (p.); Sandra Santiago, Nazaret Calzado, Lore Pérez (2), Ángela Nieto (1), Lima (1), Arcos (6), Carla Gómez (7), Sancha (2), Pessoa (4), Daniela Moreno (4) e Yaiza Alonso.
Parciais cada 5 minutos: 4-3, 7-5, 9-6, 10-8, 11-10, 13-12 (descanso); 14-16, 15-21, 19-22, 20-24, 22-25 e 25-27 (final).
Árbitros: Jordi Pinilla e Eric Deirós (do colexio catalán). Excluíron dous minutos ás xogadoras locais Berasategi e Erauskin e ás visitantes Nazaret Calzado, Lima, Sancha e Yaiza Alonso.
Incidencias: Partido correspondente á quinta xornada da Liga Guerreras Iberdrola disputado no Polideportivo Lasesarre (Barakaldo).
