- Este é o primeiro dos tres choques ligueiros do Guardés, ademais dos dous de Copa da Raíña, que afrontará o Mecalia Atlético Guardés nun mes xaneiro que estará cheo de exisencias.
- José Ignacio Prades: “É un mes moi importante para nós”
Pasou o Mundial. Pasaron as festas. Acabouse a pausa. Como para o resto da sociedade, xaneiro é un mes de reinicio para o Mecalia Atlético Guardés, que hoxe sábado 8 de xaneiro ás 18:00 horas comeza na Sangriña a súa costa particular de xaneiro recuperando o partido contra o Morvedre da sexta xornada. Aquel cruce debeu xogarse no 23 de outubro e aprazouse pola disputa da liga Europea.
Desta forma, o conxunto miñoto arrinca a competición ligueira unha semana antes ca o resto. Faio cunha misión clara: sumar todos os puntos posibles dos seis que terá en xogo neste mes, que vai concluír co dobre enfrontamento copeiro diante o Bolaños, para achegarse aos postos europeos.
Os dous primeiros estarán en disputa diante un conxunto valenciano que ocupa a undécima posición da táboa, inmerso de cheo na batalla pola permanencia, na que mantén todas as súas opcións intactas. O encontro na Sangriña é unha oportunidade para a escuadra que dirixe Vicent Sos de subir postos na táboa. Para iso, dispón dun equipo que mestura experiencia na máxima categoría -con xogadoras como Celia López ou Helena Martín- coa mocidade que representan as incipientes Lucía Gámez, Matilde Tisató ou Malena Guerisoli. Ese cóctel sabe a balonmán veloz e atrevido.
O Mecalia Atlético Guardés, pola súa banda, afronta o encontro na mesma situación na que leva todo o curso. As ausencias de Hannah Nunes e Tamires Anselmo volvéronse costume, no caso da central, non xogará en toda a tempada, polo que José Ignacio Prades deberá tirar das xuvenís para resolver a súa falta de efectivos.
Nesta ocasión serán a lateral Aroa Fernández e a porteira Márian Mera as que botarán unha man ao primeiro equipo, como xa fixeron no amigable do pasado mércores diante o Porriño, que se saldou con triunfo miñoto (27-26).
O resto, as habituais na primeira metade de tempada. Todas xuntas tratarán de sumar os dous primeiros puntos de 2022 para poñerse con 13 unidades que, aínda que non lle farían subir do sexto debido a que actualmente ocupan, si lle deixarían a tiro de pedra Caja Rural Aula Valladolid e de Costa do Sol Málaga, que teñen 14.
José Ignacio Prades, técnico do Guardés: “ Morvedre é un equipo moi perigoso”
O técnico do Mecalia Atlético Guardés advirte das complicacións que pode traer Morvedre á Sangriña a pesar de estar na zona baixa da táboa. “É un equipo moi perigoso, moi completo, novo e rápido, que expón moitos problemas e que nos vai a esixir estar a un nivel moi alto”, sostén Prades, que indica que lle “gusta moito o selo que lle imprime Vicent (Sos)”, que fai da escuadra valenciana “un equipo moi ben traballado, que xoga moi rápido” e que conxuga xogadoras con “moita bagaxe en División de Honra” con “mozas con fame”.
Con todo, o seleccionador español céntrase no seu equipo, do que encomia o seu “traballo duro” durante o Nadal. “Mereceu a pena comezar o día 27 a adestrar en dobre sesión para chegar o mellor posible a este partido aprazado, cun pouco máis de ritmo”, reflexiona.
“Este mes de xaneiro é moi importante para nós. Temos tres partidos de liga e temos que tentar sumar todos os puntos para estar arriba e pelexar polos postos europeos. Ademais temos unha competición como a Copa da Raíña, na que todo o mundo alberga unha chea de esperanzas”, conclúe José Ignacio Prades, técnico do Mecalia Atlético Guardés.
Este cruce de arranque de 2022 na Liga Guerreras Iberdrola que mide ao Mecalia Atlético Guardés e o BMMorvedre dispútase hoxe sábado, 8 de xaneiro, desde as 18:00 horas no Pavillón da Sangriña. Arbitrarán o choque os colexiados: Abel Juncal e Ángel Mateos (Galicia).
O encontro poderá seguirse ao vivo por streaming na canle de youtube do Mecalia Atlético Guardés