- O partido da décima xornada estaba previsto para o día 28, pero o acordo entre Zuazo e Guardés permitirá deixar libres as datas do Nadal.
- Será o último partido de 2022 para o conxunto que prepara Abel González, que buscará estrear a súa marcadora de vitorias como visitante.
O Mecalia Atlético Guardés e o Zubileta Evolution Zuazo chegaron a un acordo para cambiar de data e de sede o partido que debía enfrontar a ambos o 28 de decembro co club miñoto exercendo de local. Así, o encontro pasará a xogarse o próximo día 22 do mesmo mes, no pavillón de Lasesarre, en Barakaldo, ás 20:30 horas.
A primeira das modificacións responde a unha causa sinxela e previsible. Para liberar ás profesionais durante as datas do Nadal e que poidan gozar de máis días coas súas familias e seres queridos, ambos os clubs acordaron adiantar o envite a antes da Noiteboa.
O segundo cambio, o de sede, deriva dunha petición que fixo o Guardés hai semanas #ante a incerteza sobre o fin das obras na Sangriña. Por ese mesmo motivo moveuse a Donostia o choque fronte a Bera Bera, programado inicialmente para disputarse no Baixo Miño. Ante esta tesitura e co desexo de xogar todos os partidos como locais que quedan na Sangriña, a directiva que encabeza Jesús López solicitou a Zuazo intercambiar as sedes nesta primeira volta e xogar na Guarda o choque da segunda, algo que a entidade de Barakaldo aceptou con toda amabilidade.
Por iso, e aínda que A Sangriña xa se estreou a pasada fin de semana coa disputa da eliminatoria europea, o club miñoto decidiu non solicitar a reposición da sede para evitar novas alteracións á liga e á entidade biscaíña.
Este encontro pechará 2022 para o equipo que dirixe Abel González.
Tras el, as xogadoras gozarán duns días de asueto para gozar das festas do Nadal. Tras elas, reincorporaranse para afrontar un 2023 que arrinca novamente a domicilio, na pista do Costa do Sol Málaga, o próximo 14 de xaneiro.
O Guardés vaise fartar de xogar coma visitante nas vindeiras xornadas
As obras da Sangriña e o propio calendario propiciaron que o Guardés tan só disputase tres partidos de Liga Guerreras Iberdrola como local no que vai de curso. Esta dinámica compensouse a pasada fin de semana coa disputa íntegra da eliminatoria de Copa Europea na reinauguración da Sangriña.
Con todo, na competición doméstica, o equipo que prepara o técnico Abel González acumula xa cinco duelos como visitante – Elchee, Gigón, Bera Bera, Aula e O Porriño-, saldados co balance dun punto, obtido en Valladolid.
Deste xeito, o choque fronte a Rocasa deste sábado será o sexto compromiso como foráneas, mentres que o xa amentado de Barakaldo, o vindeiro xoves 22, será o sétimo. Pero é que a cousa non termina aí. O Mecalia Atlético Guardés comezará 2023 con dous novos choques fóra de casa.
O bloque de xogadoras que adestra Abel González pecharán a primeira volta en Málaga contra o Costa do Sol -14 de xaneiro- e darán comezo á segunda en Granollers -21 de xaneiro- nas dúas viaxes máis longos da tempada sen contar o voo a Gran Canaria. Desta maneira, a escuadra guardesa non xogará un partido de Liga na Sangriña ata o 28 de xaneiro, cando recibirá ao Elche.
Ata ese momento, o colectivo miñoto disputaría nove duelos como visitante por tan só tres como local. Un verdadeiro atracón lonxe de casa, que se equilibrará durante a segunda volta.
