A terceira xornada da Liga Guerreras Iberdrola deixa malos resultados para os clubs galegos. Tanto o Atlético Guardés como o Conservas Orbe Rubensa Porriño perderon os seus encontros ligueiros.
As do Baixo Miño xogaban ante o CBM Elche en terras ilicitanas e o conxunto local brillou pola súa defensa, que impediu que as de Prades puideran puntuar e volveran a Galicia cun 24-19. Pola súa banda, o Porriño xogaban en casa ante un rival do mesmo nivel. Antes do partido, asturianas e galegas empataban a puntos, pero na terceira xornada a vitoria foi das veciñas por un 27-31.
O Guardés non pode coa defensa do Elche
A primeira derrota da tempada para o Atlético Guardés chegou ante o Elche. A mala primeira metade das galegas foi moito castigo, xa que na segunda parte o conxunto visitante non puido facer fronte á diferenza de puntos.
O gol inicial chegou grazas a Paula Arcos na súa volta en casa, pero enseguida quedou oculto polo bo facer das xogadoras locais. Un devastador parcial 12-2 daba mostra da superioridade do Elche, que coa fortaleza de Tchaptchet e Zhujova no centro do 6:0 e unha inspiradísima Nicole Morales na portería lideraba no partido.
Co paso dos minutos as locais aumentaron o seu colchón de puntos no marcador. Os nervios ao verse por debaixo fixeron dano nas filas de Prades, que comezaron a ceder perdas de balón. Aos vinte minutos de partido o Guardés só levaba tres puntos.
Pola súa banda, o equipo de Rocamora seguiu sumando goles para colocarse a nove tantos de vantaxe para o descanso, deixando o electrónico no 16-7.
Para o segundo tempo as galegas intentaron loitar pola remontada, cambiando de actitude e recompoñéndose. A mellor ocasión para o Guardés chegou cunha dobre exclusión de Ivet Musons e a de Tchaptchet, o que lle permitiu xogar en superioridade varios minutos. Porén, Morales na portería do Elche impediu calquera aspiración das de Prades.
O conxunto visitante seguiu loitando ata o final, recortando a distancia no marcador ao mellorar o seu xogo na defensa con Sempere baixo paus e os ataques do resto do plantel. A falta de catro minutos o Elche estaba só a catro puntos, pero a cancerbeira Morales non deu opción ás galegas.
A MVP da xornada demostrou o seu bo facer, quedando preto dun 50% de efectividade fixo que o Guardés encaixe a primeira derrota ligueira, cun resultado final de 24-19.
A vitoria escápaselle ao Porriño nos últimos intres
Antes da celebración da terceira xornada, o Porriño e o seu rival, o Unicaja Banco Gijón, chegaban á cita empatados a puntos. A igualdade na clasificación plasmouse no terreo de xogo, cun partido que foi un tira e afrouxa e rematou en triunfo asturiano.
O ritmo do paritdo foi rápido desde o seu inicio. O ataque das visitantes, dirixido pola veterana Marizza Faria, facía presaxiar un encontro complicado para o Porriño, que xogaba sen éxito cunha defensa 6:0.
Pasados os cinco primeiros minutos, o resultado inclinábase a favor das visitantes, qeu vencía por un 1-4. Nese momento, Isma Martínez optou por pedir un tempo morto para reordear ás súas pupilas.
Pola súa banda, o Gijón aproveitaba cada erro local para aumentar a súa vantaxe, grazas a Lorena Zarco en ataque e Raquel Álvarez como cancerbeira. Co paso do tempo, as visitantes foron perdendo enerxía, dando pé a que as galegas recuperaran terreo perdido chegando a empatar cun lanzamento da extremo Thais Fermo.
Antes de que o árbitro informase do tempo de descanso, o Porriño, con Fermo no avanzado e con Ayelén acertada baixo paus, foi a vestiarios cun 15-14 a favor.
Á volta a igualdade seguía reinando na pista galega. O Porriño mostrábase enchufado no partido, mentres que as asturianas aferrábanse ao marcador estando sempre preto das locais. A falta de dez minutos para o final, o empate volvía ao electrónico nun 23-23. En menos de dous minutos, as galegas lograron situarse por enriba da man de Carme Castro, Carolina Bono e Mica Casasola.
Con todo, o Gijón, lonxe de baixar os brazos, volveu a empatar. Nos últimos instantes, as visitantes dominaban o ritmo do encontro, logrando recuperar a vantaxe perdida e pechando o partido nun 27-31 final.
