- O plantel do Atlético Guardés deu negativo no test de antígenos e viaxará no propio día do partido para medirse ao Uneatlántico Pereda. O cruce terá lugar ás 20:00 horas Polideportivo Exterior Albericia de Santander a porta pechada.
Quince días despois o Atlético Guardés volve sentir os nervios previos á competición. Tras o adiamento da eliminatoria de Copa de SM a Raíña contra o Zuazo e de novo a suspensión do choque contra Lanzarote – Puerto del Carmen, a plantilla que adestra José Ignacio Prades regresa mañá, sábado 6 de febreiro, á liga Guerreiras Iberdrola para medirse na décima xornada ao Uneatlántico Pereda (20:00 horas en La Albericia).
Viaxarán o dezasete xogadoras. Todo o plantel deu negativo no test de antígenos que pasaron a ser obrigatorios antes de cada xornada como medida de prevención de contaxio da COVID-19.
Con todas as xogadoras incluídas na viaxe, será decisión técnica quen entrará finalmente na convocatoria. Unha das dúbidas está en se a arxentina Martina Mazza podería contar con minutos por primeira vez esta tempada 2020-2021.
“En xaneiro tiñamos seis partidos e ao final só xogamos un”, lamenta o técnico do Guardés, José Ignacio Prades, quen tivo que refacer o seu plan de traballo por enésima vez no que vai de tempada.
“Ademais da falta de ritmo, que é algo xeneralizado, temos moitísimas ganas de regresar á competición, de coller un pouquiño máis de rodaxe e tamén de resarcirnos da derrota tan dura en casa o Bera Bera”, conta Prades.
José Ignacio Prades, adestrador do At. Guardés: “Ademais da falta de ritmo, que é algo xeneralizado, temos moitísimas ganas de regresar á competición, de coller un pouquiño máis de rodaxe e tamén de resarcirnos da derrota tan dura en casa o Bera Bera”
Mañá, sábado, en Santander o conxunto galego ten a súa primeira cita das once que lle esperan en 36 días para “demostrar que sabemos facer as cousas moito mellor e sobre todo prepararnos para o mes de febreiro de tolos que nos espera”, avanza.
O entrenador do At. Guardés, José Ignacio Prades, lamenta: “En xaneiro tiñamos seis partidos e ao final só xogamos un”
Viaxe no mesmo día para o Guardés
A expedición do conxunto pontevedrés sairá mañá, sábado, ás 9:00 da mañá da Guarda, fará parada en Asturias e ten prevista a súa chegada a La Albericia, en Santander, a media tarde. Alí xogará a décima xornada de liga no Grupo A da Liga Guerreras Iberdrola ante o conxunto local do Uneatlántico Pereda. Os árbitros designados para dirixir este cruce son os colexiados de Castilla y León: Luis Colmenero e Víctor Rollán.
Até última hora non estará pechada a convocatoria ao 100%. A sorpresa podería chegar co regreso as convocatorias e ás canchas da xogadora de primeira liña Martina Mazza. A arxentina podería reaparecer na pista ante un equipo ao que o Atlético Guardés xa gañou na primeira volta por marcador 33-19 e que a día de hoxe é penúltimo no Grupo A da liga Guerreiras Iberdrola cunha vitoria trabajada ante o conxunto isleño do Lanzarote – Puerto del Carmen.
Como curiosidade, a principal novidade na plantilla do conxuto que adestra o técnico Santiago Abascal son as xogadoras portorriqueñas Zuleika Fontes e Nathalys Ceballos, que se atopan adestrando co conxunto cántabro, aportando no seu día a día de adestramentos, pero que non competirán na liga española.
No Pereda pódense destacar xogadoras como as brasileiras Danielle de Sousa ou Isaura Menín, chegadas do Grafometal La Rioja e Rincón Fertilidad Málaga, respectivamente e as altas que tiveron no verán procedentes do Alcobendas (Yadira Morais, Mariña González e Alba Fernández) e Paula González do Kukugalla Etxebarri.
UNEATLÁNTICO PERADA vs GUARDÉS