- O Mecalia Atlético Guardés callou unha firme actuación colectiva, chea de compromiso e entrega ante o AtticGo Elche.
- Patrícia Lima, que volvía de lesión, fixo nove goles e Sandra Santiago cinco, tres deles consecutivos nos últimos minutos do atopo
- Míriam Sempere volveu brillar e foi clave con dous penaltis detidos
O Mecalia Atlético Guardés deu o primeiro paso cara ao seu soño. Fíxoo cunha traballadísima vitoria na pista do AtticGo Elche (22-23), que lle permite comezar cun gol de vantaxe a resolución das semifinais da European Cup, o vindeiro sábado na Sangriña.
O das galegas foi un triunfo baseado novamente no alto rendemento defensivo e no compromiso coral de todo o equipo que cristalizou en nove goles de Patrícia Lima e en tres consecutivos nos últimos minutos de Sandra Santiago. O equipo que adestra Ana Seabra fixo a primeira metade do traballo. O sábado, ás 19:30 horas, terá que completalo. En xogo, a primeira final continental da historia do balonmán galego.
O factor ambiental deixouse notar nos primeiros compases. O animoso público ilicitano impulsou ás súas xogadoras diante unhas visitantes algo tímidas. Como resultado, un 4-1 de parcial. Pero a consistencia deste Guardés aguanta o que sexa. Tamén a súa convicción.
Aos poucos, o conxunto miñoto asentouse en defensa, Míriam Sempere empezou a producir baixo os paus para equipararse coa súa homóloga na portería contraria, Nicole Morales, que empezou o duelo con moito acerto. Unha arrancada visitante provocou un parcial de 2-7 para poñerse por diante.
O demoledor poder destrutivo de Sandra Santiago, a velocidade no pivote de Cris Cifuentes primeiro e África Sempere despois, a electricidade de Pauli Fernández. Todo sumaba. Pero é nestes partidos onde Patrícia Lima está na súa salsa. A central internacional portuguesa forzou para axudar ao equipo desde dentro da pista e aínda recentemente recuperada dunha forte escordadura de nocello, callou un partido extraordinario. Cando máis apertaba o equipo local, anotou varios goles seguidos con lanzamentos en apoio.
Na segunda metade un gol dá o triunfo ao Guardés
Pero foi na segunda parte cando a de Matosinhos desatouse. Unha actuación portentosa elevou a súa cifra goleadora aos nove tantos, ademais dun notable labor defensivo e de dirección. A pesar de todo, o AtticGo Elche seguía en partido. O conxunto ilicitano recortou tres goles de desvantaxe ao final do primeiro acto e no arranque do segundo soubo aproveitar á perfección os momentos de superioridade numérica para lograr vantaxes. Iso si, sen pasar nunca dun gol.
Chegados os dez minutos finais, parecía claro que, fora cal fora o resultado, ía ser ajustadísimo. A Sangriña ditará sentenza. Quizais por esa igualdade, era importantísimo rascar de onde se puidese. Un roubo e un gol nun minuto por parte de Daniela Moreno foi o disparador.
Logo chegou a terceira exclusión de Alexandra do Nascimento e a irrupción de Sandra Santiago no momento clave. A de Águeda asumiu a responsabilidade con dous goles seguidos desde os sete metros e un máis en penetración.
Antes, na outra portería, Míriam Sempere detivera outros tantos penaltis. Coa súa actuación e a da defensa, o Mecalia Atlético Guardés aguantou e selou unha vitoria pola mínima, pero vitoria á fin e ao cabo. O sábado que vén, a resolución na Sangriña.
FICHA TÉCNICA
22) ATTICO ELCHE (12+10): Nicole Morales (p.); Zhukova (1), Van Zijl (3), Oppedal, Celia Guilabert (1), Patri Méndez (3), Nuria Andreu, Pamela Rodrigues (p.), Clara Gascó (2), María Flores (3), Zaira Benítez (2), Elena Martínez (2), Pipy Wolfs (1), Paola Bernabé (3), Alexandra do Nascimento (1) e Raquel Morei.
23) MECALIA ATLÉTICO GUARDÉS (12+11): Míriam Sempere (p.); África Sempere (2), Sandra Santiago (5), Giselle Menéndez (1), Carolina Silva, Pauli Fernández, Marisol Carratú (p.), Cris Cifuentes (3), Celia López, Elena Amores (2), Carla Gómez, María Sancha e Daniela Moreno (1).
MARCADOR CADA CINCO MINUTOS: 2-0, 4-2, 5-6, 7-8, 9-11, 12-12 – descanso – 13-14, 15-15, 16-16, 19-18, 20-20 e 22-23.
EQUIPO ARBITRAL: Barbora Bocakova e Lucia Janosikova (Eslovaquia). Expulsaron por tripla exclusión a Alexandra do Nascimento, do Elxe (min. 57). Excluíron con dous minutos ás locais Celia Guilabert (2), Zaira Benítez e Pipy Wolfs e ás visitantes Estefanía Descalzo, Celia López, Carla Gómez e María Sancha.
INCIDENCIAS: Partido de ida das semifinais da Copa Europea European Cup , disputado no pavillón Esperanza Lag de Elche.
