- Con esta iniciación, nenas e nenos das xeracións de persoas nacidas entre 2010 e 2016 poderán coñecer o xogo e o club.
- A entidade ofrece diversas opcións: os días 15, 17 e 19 de agosto, no CEIP Sinde da Guarda; e o 22, 24 e 26 nas pistas exteriores do pavillón de Goián e haberá dúas quendas: de 19:00 a 20:00 e de 20:00 a 21:00.
No Mecalia Atlético Guardés pensan que o futuro constrúese desde os cimentos. Desde abaixo. É por iso que o club da Guarda quere “redobrar a súa aposta pola canteira”. Para iso, impulsa unhas xornadas de iniciación pensadas para nenas e nenos nados entre 2010 e 2016.
“A idea é que poidan probar este marabilloso deporte e quedar seducidos por el para seguir desenvolvéndose a nivel deportivo, persoal e social a través del”, explican desde o club galego. Para iso, Fabio Lima, coordinador da base da institución guardesa, bosquexou unhas actividades sinxelas e divertidas para que pequenos e pequenas poidan gozar, facer novas amizades e, por que non, dar o primeiro paso nunha traxectoria ligada ao balonmán.
As xornadas están divididas en dous bloques. O primeiro, durante os días 15, 17 e 19 de agosto no CEIP Manuel González Sinde da Guarda. O segundo, a seguinte semana: o 22, 24 e 26 do mesmo mes, nas pistas exteriores do Pavillón de Goián. En ambos os casos, os horarios son os mesmos: unha quenda desde as 19:00 ás 20:00 e outro, inmediatamente despois, de 20:00 a 21:00. En total, unha ducia de sesións de iniciación.
Esta iniciación ao balonmán da mán do Guardés é de balde
Segundo informan desde o Mecalia Atlético Guardés, “esta actividade é totalmente gratuíta e estará monitorizada polo propio Fabio Lima, en estreita colaboración co seu equipo de adestradores de canteira. Tamén participarán, ademais, as xogadoras do primeiro equipo, así como o seu corpo técnico, comandado por Abel González”.
Explican desde o Atlético Guardés que as clases “serán eminentemente lúdicas, pero sempre cun importante factor de desenvolvemento psicomotriz para os nenos, ademais de fomentar o compañeirismo, o traballo en equipo e toda unha serie de valores intrínsecos ao balonmán e ao deporte en xeral”.
✍️Queres vivir bos ratos, facer amizades, aprender unha chea de cousas e pasalo moi ben?
👨👩👧👦 Temos todo isto e moito máis na nosa familia. E queremos que formes parte dela.
🤾♀️ Se naceches entre 2010 e 2016, ven probar o balonmán con nós nas nosas xornadas de iniciación. pic.twitter.com/u5fpNGikIb— Mecalia Atlético Guardés (@Atlguardes_ofic) August 1, 2022
Estas xornadas de iniciación encádranse dentro do obxectivo marcado por Fabio Lima de crear esta tempada equipos de Biberóns -entre 5 e 6 anos- e Chupetes -entre 3 e 4-, que agrupan as franxas de idade máis baixas, para inculcar o balonmán aos pequenos e pequenas desde ben pronto.
Para participar, simplemente hai que apuntarse neste formulario web. Tamén se pode solicitar máis información enviando un correo a base@balonmanatleticoguardes.com.
🙋🏼 Ola! A nosa base é o noso futuro e dende aquí contaremos o noso presente.
🤗 Acompañádenos! pic.twitter.com/KB7hP1rfnJ— Base Guardés (@BaseGuardes) August 1, 2022
