- O equipo miñoto do Guardés estrelouse contra Castellanos e a frescura das xogadoras costasoleñas, menos castigadas a nivel físico cas galegas.
- Un parcial de 1-6 tras dous goles iniciais do Mecalia marcou a pauta do encontro.
Non puido ser. O soño do Mecalia Atlético Guardés terminou na final. Pero as xogadoras do Guardés fixeron historia para o balonmán feminino galego ao lograr o primeiro subcampeonato de Copa dun equipo da nosa comunidade. O conxunto miñoto tentouno, pero enfronte atopouse unha gran Costa del Sol Málaga, cunha Meche Castellanos inconmensurable, que fixo valer a súa condición de favorito e a súa maior frescura.
Ver esta publicación en Instagram
O conxunto malacitano gañou con moita comodidade ao Elche en semifinais. Tanto, que mesmo se puido permitir dar descanso aos seus pesos pesados na segunda parte. En cambio, o Mecalia tivo que espremerse ata a extenuación contra Granollers e, sobre todo, contra Bera Bera. Cando se viu en desvantaxe, o esgotamento aflorou e o partido decidiuse. A pesar da enorme decepción e tristeza final, o fito é histórico para o balonmán feminino galego.
Non empezou mal o Mecalia Atlético Guardé. Ao contrario. Dous goles consecutivos de Pessoa e Naza Calzado poñían no disparadero ao conxunto que prepara José Ignacio Prades. Foi só un simulacro. Porque Málaga púxose ao choio coas dúas armas que máis danaron ao conxunto miñoto no primeiro tempo. Castellanos paraba, Sole López corría. Deste xeito asinaron 10 paradas e seis goles, respectivamente, nos primeiros 30 minutos.
Ese impulso levou ao colectivo costasoleño a cravar un parcial de 1-6 co que marcou a pauta de todo o primeiro acto. O Mecalia Atlético Guardés reaccionou, axustouse en defensa e Carratú parou. Por momentos, púxose a dous tantos, pero cada vez que unha inercia achegaba ás xogadoras de branco no marcador, Castellanos botaba a persiana. A gardameta manchega negou unha e outra vez o gol ás do Baixo Miño.
Esa falta de acerto na portería terminaba pagándose na propia. Porque se o Costa del Sol Málaganon corría, era Arderius a que facía fluír ás súas nos ataques posicionales. Así, as vantaxes andaluzas estabilizáronse ao redor dos tres goles, que foron catro ao descanso (10-14).
Á volta dos vestiarios, o decorado non cambiou. Se seica, acentuouse. O Costa del Sol Málaga castigou con virulencia as dúbidas do equipo miñoto no arranque e cun 1-4 de saída levou o choque a uns sete tantos de renda case insalvables. É neses momentos de dúbida cando aparece o cansazo no que non se reparou ata entón. As pernas pesaban e a cabeza dubidaba. Non había forma de reducir a diferenza.
O Guardés opta por defensa 5:1
E non sería porque José Ignacio Prades non o tentase. Meteu a Míriam Sempere en portería e a María Sancha na primeira liña. Cambiou a defensa 5:1. Axitou todas as ramas da súa árbore, pero practicamente non caeron mazás. Desgraciadamente para o Guardés e para as 3.086 persoas presentes en Illumbe, a final terminou antes de tempo.
Os últimos compases transcorreron entre a alegría costasoleña e a decepción miñota, lóxica, porque ninguén quere perder unha final. Pero para perdela hai que xogala e o Mecalia Atlético Guardés fíxoo por primeira vez. Iso xa está na historia do club e do balonmán galego.
Andalucía acollerá a seguinte fase final da Copa da Raíña
Consumada a gran final da XLIII Copa da S.M. a Raíña de balonmán feminino entre o Mecalia Atlético Guardés e o Costa del Sol Málaga, que encumbrou por segunda vez na súa historia ás malagueñas, producíase o traspaso da bandera organizativa do evento copeiro. Na vindeira campaña a fase final do torneo do KO terá lugar na capital da Costa del Sol, segundo informa a RFEBM.
Tati Garmendia, responsable de balonmán do club local, o Super Amara Bera Bera, e Harkaitz Millas, diputado de Deportes de Gipuzkoa, foron os encargados de ceder a bandeira ao presidente da Real Federación Española de Balonmano, Francisco V. Blázquez, que, á súa vez, facía entrega da mesma a María José Moreno, presidenta do conxunto gañador da Copa, o Costa del Sol Málaga, María de Nova, directora general de Promoción do Deporte da Junta de Andalucía, e Ignacio Gómez, director de Málaga Deportes y Eventos, entidades que asumen o reto da organización do evento a próxima tempada.
FICHA TÉCNICA
26) MECALIA ATLÉTICO GUARDÉS (10+16): Marisol Carratú (p.), Míriam Sempere (p.) Marián Mera (p.); Nazaret Calzado (4), Carolina Silva, Lorena Pérez, Ángela Nieto (3), Estefanía Descalzo (1), Patrícia Lima (6), Paula Arcos (3), Carla Gómez, María Sancha (2), Gabriela Pessoa (6), Daniela Moreno (1), Aroa Fernández e Yaiza Alonso.
33) COSTA DEL SOL MÁLAGA (14+19): Merche Castellanos (p.), Virgi Robles (p.); Estela Doiro (3), Silvia Arderius (5), Sole López (9), Sara Bravo (1), Talita Alves (1), Rocío Campigli (1), Almu Gutiérrez, Espe López (6), Carla Barranco, Laura Sánchez (2), Isa Medeiros (3), Desiré Segado, Rocío Rojas e Paula García Ávila (2).
MARCADOR CADA CINCO MINUTOS: 2-2, 3-6, 6-8, 8-9, 8-12, 10-14 – descanso – 12-19, 15-22, 17-25, 20-27, 24-30, 26-33.
EQUIPO ARBITRAL: Yon Bustamante e Javier Álvarez Mata. Excluíron dous minutos a María Sancha, do Mecalia Atlético Guardés, e a Espe López, del Costa del Sol Málaga.
INCIDENCIAS: Final da Copa da Raíña, disputado no Donostia Arena de Illumbe en San Sebastián.
Ver esta publicación en Instagram
