O Atlético Guardés segue preparando a tempada 2021/2022 para a cal contará coas súas dúas porteiras de confianza. Marisol Carratú e Miriam Sempere seguirán baixo os paus da meta da Sangriña un curso máis.
As dúas gardametas son as primeiras renovacións do club galego, que aposta unha vez máis por dous dos piares do seu proxecto. Carratú cumprirá a súa quinta tempada, é unha das capitás do equipo e é a única xogadora que queda do plantel campión de Liga no 2017.
Carratú: “É un gran honor que sigan confiando en min”
A arxentina declarou que “é un gran honor que sigan confiando en min para poder defender as cores desta gran familia”. De cara a vindeira campaña, a porteira espera “seguir medrando tanto deportiva como persoalmente. En cada tempada, as ilusións renóvanse”.
Pola súa parte, Sempere xogará por segunda tempada consecutiva no equipo do Atlético Guardés, despois de dar unha gran impresión no seu primeiro ano como xogadora do Baixo Miño. “Estou moi contenta de continuar”, asegurou a alicantina, que prevé a vindeira temapda como “moi ilusionante e bonita. Imos pelexar por todas as competicións”.
No nivel persoal, esta gardameta asegura que “seguiré traballando para aportar ao equipo todo o que poida en cada adestramento e en cada partido”.
