- A internacional portuguesa Sandra Santiago continuará no curso 2022/23, será o cuarto na Guarda para ela.
- A xogadora palentina renova tras unha gran toma de contacto coa categoría e disposta a ir a máis no seu segundo ano.
O Mecalia Atlético Guardés segue dando pasos na confección do seu persoal para a próxima tempada. E, no referente á primeira liña, pechou a continuidade de Sandra Santiago e María Sancha. Para a internacional lusa será a cuarta campaña na desembocadura do Miño, mentres que a palentina sumará a segunda, despois de chegar o pasado verán á Sangriña para debutar na máxima categoría tras explotar no Rodríguez Cleba leonés de Prata.
Santiago, pola súa banda, chegou en 2019 xunto á súa compañeira de selección Patrícia Lima. Ambas creceron xuntas na Guarda, tanto dentro como fóra da pista. E seguirano facendo o ano que vén. Ademais do dinamismo propio dos ataques do conxunto miñoto, Sandra Santiago achega lanzamento exterior. Un matiz que a adoita distinguir do resto da primeira liña e un valor engadido en moitos partidos.
Esta tempada Sandra Santiago achegou 71 goles ao equipo, entre outras moitas cousas. A gran espiña cravada foi unha luxación de ombreiro producida nun partido con Portugal, que a apartou de disputar a fase final da Copa da Raíña en Donostia, onde acudiu para apoiar ás súas compañeiras desde fóra.
“Estou moi contenta de renovar un ano máis e seguir formando parte deste gran club”, explica a primeira liña de Águeda. “É unha alegría poder seguir gozando deste bonito pobo, que é A Guarda, e tamén da mellor afección do país”, engade Sandra Santiago, que se mostra con “moitas ganas” de “comezar a nova tempada, coñecer ás novas compañeiras e seguir levando o nome do Atlético Guardés e da Guarda por Europa”.
E se o ano pasado foi o do debut, o que vén será o da confirmación para María Sancha. A palentina deixou unhas sensacións inmellorables nos minutos que estivo en pista. E aínda que chegou á Guarda como central, a maior parte dos minutos desta estrea en División de Honra producíronse xogando en ambos os laterais.
Electricidade pura. Penetracións punzantes, cambios de dirección fulgurantes e moita fluidez convertérona nun complemento perfecto, capaz de cambiar o rumbo dos partidos saíndo desde o banco. María Sancha sumou 51 tantos este curso. O seu obxectivo para o próximo é mellorar todos os seus números e consolidarse definitivamente na liga Guerreras Iberdrola.
“Estou súper contenta de renovar un ano máis. Síntome moi a gusto tanto co club como coa xente do pobo porque sinto que é coma se estivese na miña casa”, destaca a palentina, que augura unha tempada 2022/23 “difícil” pero que tamén terá “bos momentos” nas tres competicións que disputará o Guardés. “Imos ter un equipo competitivo, que poderá loitar polos postos de arriba e imos estar tamén en Europa, que é un punto moi a favor”, expresa María Sancha, que espera “gozar, facer gozar, xogar e que salga todo ben”.