O Mecalia Atlético Guardés pechou o pase á Q3 da liga Europea a pesar de perder co Hypo Niederösterreich na Sangriña. Unha derrota que nunca puxo en xaque o sete tantos que as xogadoras de José Ignacio Prades obtiveron de renda no partido de ida de hai unha semana en Austria (21-28). As austriacas, que forzaron a máquina ao máximo, nunca se foron máis aló do tres tantos de diferenza. Na Q3 espéralles o Besançon francés.
De feito, o choque entrou igualado aos últimos minutos, momento que o técnico alacantino aproveitou para premiar ás xuvenís Márian Mera e Aroa Fernández con minutos. Así, ambas se uniron ao seu outra compañeira de equipo, Yaiza Alonso, e ao resto de xogadoras na festa final que se desatou no recinto guardés para celebrar o pase á última rolda previa, na que o Guardés se medirá ao Besançon francés.
Todo iso nun partido extremadamente igualado, no que José Ignacio Prades, volveu apostar polo 5:1 en defensa, igual que en Austria. Nesta ocasión non houbo factor sorpresa e o Hypo Niederösterreich soubo como danar á retagarda local. No outro lado, unha sobresaliente Stephanie Reichl producía na portaría. Así, as diferenzas eran mínimas e o partido transcorría nun continuo intercambio de golpes.
Probablemente motivadas por desarbolar o ritmo baixo das austriacas, as locais buscaron ataques rápidos. Seguramente demasiados. Esa intensidade e velocidade tornábase precipitación por momentos e desa maneira producíronse numerosas perdas en ataque e fallos no lanzamento. Os primeiros 30 minutos terminaron en empate, cun tenteador de 15-15.
Á volta dos vestiarios, o Hypo queimou as naves. Pasou a atacar permanentemente con sete, deixando a súa portaría desguarnecida. A diferenza do partido de ida, no que o Guardés penalizou esta opción con varios goles a portaría baleira, a escuadra vienesa fixo máis dano. Soubo atacar coa liña e foise até a tres goles de vantaxe.
Foi un momento de dúbida moi breve. Arcos e Lima apertaron o acelerador e o equipo axustouse mellor en ataque para atopar varios goles tranquilizadores. Tamén axudaron un par de roubos con goles a portaría baleira de Pessoa e os propia Arcos, ademais doutro de portaría a portaría de Míriam Sempere.
Co tenteador máis igualado e o billete no peto, José Ignacio Prades, deulle minutos a Márian Mera na portaría e a Aroa Fernández, que se uniron a Yaiza Alonso no trío xuvenil en gozar da experiencia europea. O Hypo aproveitou para adquirir un par de goles de vantaxe e levar a vitoria. Pero o pase e a festa eran locais.
O Mecalia Atlético Guardés avanza cara á Q3 da Liga Europea onde xa lle espera o conxunto francés do Besançon. Ese cruce será en menos dun mes: a ida, o fin de semana do 13 de novembro e a volta, sete días despois.
FICHA TÉCNICA
25) MECALIA ATLÉTICO GUARDÉS (15+10): Carratú (porteira), Míriam Sempere (porteira) (1) Márian Mera (p.); Sandra Santiago (2), Nazaret Calzado (2), Lore Pérez (6), Ángela Neto, Lima (2), Arcos (6), Carla Gómez, Sancha (1), Pessoa (3) e Daniela Moreno (2), Aroa Fernández e Yaiza Alonso.
27) HYPO NIEDERÖSTERREICH (15+12): Hajgato (porteira), Lea Krenn (p.), Reichl (porteira); Schindler (11), Leitner (1), Neidhart (4), Gorza (1), Dedic (2), Kaiser (2), Hödl (1), Betz (1), Draguljic, Wess (3), Bauer, Berlini e Pandza.
PARCIAIS CADA 5 MINUTOS: 4-3, 5-5, 10-9, 11-12, 14-14, 15-15 (descanso); 18-19, 19-21, 22-23, 23-24, 24-25 e 25-27 (final).
ÁRBITROS: Francesco Simone e Pietro Montillo, ambos os dous italianos. Excluíron dous minutos ás xogadoras locais Sandra Santiago e Daniela Moreno, así como ás deportistas visitantes Dedic (2), Bauer e Berlini.
INCIDENCIAS: Partido correspondente á volta da Q2 da liga Europea de balonmán feminino disputado na Sangriña. A ida xogouse en Austria.
