- O Mecalia Atlético Guardés sabe que é clave gañar ao KH-7 BM Granollers para seguir recuperando posicións na táboa e, de paso, distanciarse da zona baixa.
Non sempre é fácil en deporte marcar un obxectivo único e claro. E máis co novo formato que a Liga Guerreras Iberdrola estrea esta tempada, con ese play-off polo título cos oito primeiros clasificados e o play-out de permanencia cos catro últimos. Como é lóxico, o mínimo que se marca o Mecalia Atlético Guardés é esquivar esa loita pola salvación. A partir de aí, quedar o máis arriba posible para conseguir mellores condicións na batalla final.
E nesas está a escuadra que dirixe Abel González, que abandonou o perigoso noveno posto co seu triunfo en Málaga, coincidindo co final da primeira volta. Agora, co comezo da segunda, non quere quedar aí. Por iso, viaxa coa intención absoluta de gañar na pista do KH-7 BM Granollers (sábado 21 de xaneiro, 17:00 horas). O partido vai ser arbitrado por Jordi Pinilla e Eric Deirós. Poderá seguirse ao vivo en liña a través de Vallès Oriental TV.
🏴☠️ HOXE NAVEGAM0S
⌚️ 17:00
🆚 @BMGranollers
🏟️ Palau D’Esports
⛵ Granollers
🏆 @IberdrolaDHF
🗒️ Xornada 12
👀 https://t.co/XOnPa4VAnB#TodasABordo pic.twitter.com/3aQaOY3ZqU— Mecalia Atlético Guardés (@Atlguardes_ofic) January 21, 2023
O fantástico Palau D’Esports do conxunto catalán será o escenario do punto de partida dunha segunda volta que se presenta esperanzadora. Como é lóxico, fuxir da parte baixa significa escalar cara á alta. E para conseguir ambas as metas, que en realidade son a mesma, o Mecalia Atlético Guardés ten o factor A Sangriña ao seu favor.
Cambian tórnalas. Oito dos once encontros que quedan ao colectivo que prepara Abel González serán en casa, con todo o que iso supón. Dito doutra forma, o de Granollers será o primeiro do únicos tres duelos a domicilio que disputará a formación miñota no que queda de Liga. Os outros dous serán na pista dos recentemente ascendidos Sporting La Rioja e Beti-Onak. Sobre o papel, o vento sopla a favor nesta parte da competición. Pero haberá que demostralo na pista.
KH-7 BM Granollers, penúltimo
Unha vez retirado o tapón das vitorias a domicilio, o Mecalia Atlético Guardés quere deixar saír toda a auga. É verdade que as representantes do Baixo Miño superaron ás do Vallès Oriental no agónico final do encontro inaugural da competición, en Tui (24-23). Tamén que o equipo que dirixe Dolores Martín é penúltimo. Pero non é menos certo que só perdeu un partido do últimos catro, cunha vitoria e dous empates que poñen ao seu novo bloque de xogadoras en disposición de ir cara arriba na segunda parte da liga. Argumentos non lle faltan. Internacionais como a porteira Nicole Wiggins ou a extremo Ona Veguè son exemplos do seu potencial. Tamén xogadoras máis que interesantes como Martina Capdevila ou Ester Somaza.
Pero máis aló do que fagan os demais, o Mecalia Atlético Guardés quere seguir mirando cara a si mesmo. A sensacional vitoria en Málaga foi un punto de inflexión, confirmado co dobre triunfo diante o H71 Hoyvík das Faroe Islands na eliminatoria de oitavos de final da EHF European Cup de balonmán.
A igualdade reinante na liga Guerreras Iberdrola deixa a quinta praza a tan só tres puntos de distancia. Xusto os que quere conquistar o conxunto miñoto en Granollers, onde acode con todos os seus efectivos. A viaxe será en avión o propio sábado. A expedición partirá do aeroporto de Peinador, en Vigo, á primeira hora da mañá, e regresará pola noite vía O Porto.
O técnico do Mecalia Atlético Guardés, Abel González, apuntaba na previa que “o calendario é bastante favorable, pero non vai haber partidos fáciles. Haberá que pelexar moito para sacar os puntos. Ninguén tira a toalla e todos os equipos van loitar ata o final”, avisa.
Ademais, o adestrador das galegas apuntaba que o bloque quere “aproveitar esta serie de resultados” bos que está colleitando o conxunto da Guarda.
“Sabemos cal é a liña para seguir gañando”, di Abel González, adestrador do Guardés
