- O Mecalia Atlético Guardés xa se mediu -e eliminou- ao conxunto centroeuropeo en 2017.
- José Ignacio Prades segue sen poder contar coas brasileiras Tamires Anselmo e Hannah Nunes e leva á xuvenil Yaiza Alonso en busca dun resultado que lles permita resolver a eliminatoria na Sangriña.
Nove anos despois segue sendo especial. Sempre o é. Competir en Europa é unha faísca brillante nos ollos. Das xogadoras, que afrontan un reto diferente e unha experiencia valiosa. E da afección, que tempada tras tempada ve ao seu equipo representar ao seu pobo e ao seu club polo vello continente. Non é diferente este curso, o noveno consecutivo polo vello continente. O Mecalia Atlético Guardés encárao esta vez na EHF European League -a segunda competición en importancia tras a liga de Campións-.
José Ignacio Prades e as súas pupilas inician o reto desde a segunda rolda previa. É dicir, que para acceder á fase de grupos, deben superar este chanzo e outro máis.
Pero non se pode dar o terceiro paso antes do primeiro. O conxunto miñoto debuta en Europa este curso visitando a un vello coñecido. O Hypo Niederösterreich austriaco porá a proba a capacidade internacional dun Guardés que comeza hoxe sábado 16 de outubro a súa andaina continental na localidade austriaca de Maria Enzersdorf (17:00 horas, TVG2).
A expedición partiu o venres ao mediodía cara ao país centroeuropeo coa intención de obter un bo resultado que permita resolver a eliminatoria no choque de volta na Sangriña, o domingo 24 de outubro (19:00). A expedición, que lidera o presidente Jesús López, voaba desde Peinador até Viena cunha escala en Madrid.
👋🏻 Hallo, BSFZ Südstadt!#InfernoEuropeo 🇪🇺#OnosoInfernoéonosoceo 🖤💛 pic.twitter.com/tq8pEjI7QA
— Mecalia Atlético Guardés (@Atlguardes_ofic) October 16, 2021
Tres meses despois, as guardesas visitan a localidade de Maria Enzersdorf, a apenas 25 quilómetros do centro de Viena, para medirse a un vello coñecido das batallas europeas. A escuadra centroeuropea xa se viu as caras co equipo de Prades en dúas cruces.
No anterior, visitaron Austria o 13 de outubro de 2018. Era a segunda rolda previa da EHF Cup, e aínda que o Mecalia sucumbiu na ida (22-20), deulle a volta á situación na Sangriña (28-22). O outro precedente deuse na fase previa da liga de Campións, con triunfo do Hypo a domicilio (27-29).
Este sábado, unha nova cita. Esta vez na previa da European League. Aínda que agora non se mida coa flor e nata do continente, o Hypo é un dos xigantes de Europa. Sobre todo nunha esplendorosa década dos 90, na que conquistou oito Ligas de Campións entre o 89 e o 2000.
O conxunto centroeuropeo chega nun estado de forma inmellorable, con pleno de vitorias na súa Liga, todas elas, ademais, por goleada. Conta co bloque principal da selección austriaca, como o pivote Stefanie Kaiser, a lateral esquerda Nina Neidhart, extremo zurda Claudia Wess, a central Johanna Schindler ou a extremo destra Mirela Dedic. Xunto ao resto das súas compañeiras, conforman un equipo moi físico e con moita experiencia.
Así chega o Mecalia At. Guardés ao cruce
O Guardés, pola súa banda, chega ao duelo tras derrotar ao Granollers antes do parón por seleccións. A diferenza doutros equipos españois que xogan en Europa, como o Bera Bera ou o Rocasa, o equipo miñoto disputará o seu partido de liga correspondente á xornada deste fin de semana o vindeiro mércores en Barakaldo ante o Zuazo. Aínda que será un problema para preparar a volta, supuxo unha solución para traballar de cara ao primeiro encontro.
Nesa cita José Ignacio Prades non terá ás brasileiras Tamires Anselmo e Hannah Nunes, que seguen de baixa por senllas lesións de xeonllo. Tampouco viaxa Estefanía Descalzo por asuntos laborais. Si subiu ao avión a xuvenil Yaiza Alonso para completar unha curta convocatoria de 13 xogadoras.
O obxectivo, obter un bo resultado que permita ao Mecalia Atlético Guardés resolver a eliminatoria o domingo 24 diante da súa afección ou, canda menos, encamiñala xa a domicilio.
José Ignacio Prades advirte: “O Hypo é un equipo moi difícil de bater”
