Grupo polo título da liga Guerreras Iberdrola, EHF European Cup e Copa de SM a Raíña. Tres camiños paralelos que debe percorrer o Atlético Guardés nas próximas nove semanas.
O equipo do Baixo Miño espera até o martes para exercitarse ao completo e empezar a preparar ao cento por cento o primeiro partido do seguinte maratón que espera ás de José Ignacio Prades.
Será unha cita moi especial na Sangriña, que acollerá por primeira vez a ida dunhas semifinais europeas. Nesta ocasión, o rival será o Rincón Fertilidad Málaga nun partido que se xogará o domingo 28 de marzo e que finalmente adiantou o seu horario previsto, das 20:00 ás 19:00 horas, para ser emitido pola Televisión de Galicia.
Tras isto, o Atlético Guardés tamén dará o pistoletazo de saída ao grupo polo título da liga Guerreras Iberdrola na Sangriña. Tras lograr a clasificación para coarse entre o oito conxuntos que aspiran a campión ligueiro, o conxunto galego medirase polos primeiros dous puntos ao Bm. Elche – visitelche.com o mércores 31 de marzo ás 20:15 horas.
Primeira xornada e de novo a cambiar o chip para porse en modo Europa. O sábado 3 de abril ás 19 horas en Ciudad Jardín (Málaga) dilucidarase o pase á final da EHF European Cup.
Copa da Raíña co Zuazo e volta á liga ante o Granollers
O seguinte reto do Atlético Guardés non será menor: buscar a remontada contra o Zubileta Evolution – Bm. Zuazo na volta da segunda fase da Copa de SM a Raíña. E é que se o Atlético Guardés quere estar presente na fase final que se celebrará en Telde os días 21, 22 e 23 de maio deberá reverter a derrota (27-24) encaixada en Lasesarre. Para logralo, o equipo da Guarda contará co apoio da súa afección no Inferno da Sangriña o mércores 7 de abril ás 20:15 horas.
Facendo encaixe de palillos o Guardés conseguiu liberar a data do 7 de abril para completar a eliminatoria copeira e non dilatar o sorteo da fase final ou a posible organización da viaxe ás illas. Por iso, a xornada ligueira prevista para esta semana, a segunda do calendario, contra o Rocasa Gran Canaria aprázase de mutuo acordo co club presidido por Yubal Moreno ao 28 de abril (20:00 hora insular, Pavillón Antonio Moreno).
Debido a este cambio, a seguinte xornada da liga Guerreras Iberdrola que xogarán as galegas é a terceira, en casa, e contra o KH7 Bm. Granollers (sábado 10 de abril ás 19:00 horas).
Haberá semana de parón pola actividade internacional antes de que as galegas visiten ao Liberbank Xixón na Area (19:00 horas) o sábado 24 de abril para afrontar a cuarta xornada -data inicialmente prevista para a disputa da XLII Copa da Raíña en San Sebastián-.
Agora si, as xogadoras que adestra José Ignacio Prades viaxarán a Canarias (J2, 28.04, 20h insular) para na mesma semana visitar ao Balonmano Elche en Carrús (xornada 5ª, sábado 1 de maio, 18:00 horas). Sete días despois, será momento de recibir na Sangriña ao Rocasa (xornada 6ª, sábado 8 de maio, 19:00 horas).
Estas dúas xornadas (quinta e sexta) estarán condicionadas pola competición continental, xa que a EHF contempla estes dous fins de semana para unha hipotética final da EHF European Cup.
O día 15, o Atlético Guardés visitará o Palau dEsports de Granollers na sétima xornada (19:00 horas) de Liga Guerreras Iberdrola, a penúltima antes da Copa da Raíña (que se disputará os días 21, 22 e 23 de maio). A liga decidirase o último fin de semana de maio, momento no que as de A Guarda mediranse ao Liberbank Bm. Gijón en casa (xornada 8ª, 19:00 horas, A Sangriña).
ASÍ É A AXENDA DO ATLÉTICO GUARDÉS CHANZO A CHANZO
EHF European Cup | Ida das Semifinais | vs Rincón Fertilidad Málaga, 28.03, 19:00 horas, A Sangriña
Liga Guerreras Iberdrola | Grupo Título | X1 | vs Bm. Elche, 31.03, 20:15 horas, A Sangriña
EHF European Cup | Volta das Semifinais | vs Rincón Fertilidad Málaga, 03.04, 19:00 horas, Ciudad Jardín
Copa da Raíña | Volta da 2ª Fase | vs Zubileta Evolution Bm. Zuazo, 7.04, 20:15 horas, A Sangriña
Liga Guerreras Iberdrola | Grupo polo título | X3 | vs KH7 Bm. Granollers, 10.04, 19:00 horas, A Sangriña
Liga Guerreras Iberdrola | Grupo polo título | X4 | vs Liberbank Bm. Gijón, 24.04, 19:00 horas, La Arena
Liga Guerreras Iberdrola | Grupo polo título | X2 | vs Rocasa Gran Canaria, 28.04, 20:00 horas insular, Telde
Liga Guerreras Iberdrola | Grupo polo título | X5 | vs Bm. Elche, 01.05, 18:00 h, Carrús
Liga Guerreras Iberdrola | Grupo polo título | X6 | vs Bm. Rocasa Gran Canaria, 8.05, 19:00 horas, A Sangriña
Liga Guerreras Iberdrola | Grupo polo título | X7 | vs KH-7 Bm. Granollers, 15.05, 19:00 horas, Palau d’Esports
Fase final Copa da SM a Raíña – 21, 22 e 23 de mayo
Liga Guerreras Iberdrola | Grupo Título | X8 | vs Liberbank Gijón, 29.05, 19:00 horas, A Sangriña
