Hai algo máis dun ano, cando estabamos artellando este proxecto e As Nosas aínda non vira a luz, pedímosvos a vosa axuda para presentar o noso xornal ao público. Fúchedes moitas mulleres do deporte galego as que confiáchedes en nós cos ollos pechos e accedíchedes a dárnola benvida antes de vernos nacer.
Houbo representación de deportes de equipo, individuais, campioas olímpicas, deportistas da base… Entre todas constituídes a razón de ser deste proxecto, o seu alicerce, a súa alma, e o latexo que o move.
Seguro que o lembrades, pero daquela petición que fixemos, coas vosas achegas saíu o noso vídeo de lanzamento hai un ano. Fagamos memoria xuntas:
Agora, un ano despois, logo de tanto bo e malo como tivo o 2020 que acaba de rematar, volvémosvos pedir que vos sumarades á nosa alegría. Desta volta, polo feito de cumprir un ano de vida.
Velaí o noso vídeo de aniversario do que, como non podía ser doutro xeito, vós, as mulleres do deporte galego, sodes as protagonistas. Deportistas, adestradoras, xuízas, psicólogas, directivas, seareiras… todas sodes unha parte esencia da paixón que nos une: o deporte.
Así, un ano despois, recibimos co enorme ledicia os vosos parabéns. Sabiamos que era imposible reunirvos a todas nun vídeo, ademais a imposibilidade de vos xuntar para adestrar limitou a participación nesta peza dalgunhas de vós.
Así que, para que a festa continúe, propoñémosvos aumentar a lista. Estaríamos felices de que moitas e moitos vos sumásedes a esta festa de aniversario virtual, de xeito individual ou en grupo. Velaí a nosa proposta: se queredes, agardamos os vosos comentarios nas nosas redes ou, por exemplo, as vosas stories en Instagram contándolle ao mundo que vós tamén sodes As Nosas. Non esquezades etiquetarnos para que podamos montar unha storie destacada e que sexa, de verdade, unha festa.
