“Dáche máis seguridade, andas máis tranquila sinceramente”, confesa Sofía Estévez, unha das loitadoras de grappling do Ximnasio Graíño da Coruña. Esta modalide de loita de agarre, que se basea no obxectivo de vencer fisicamente ao rival, da ferramentas ás loitadoras para enfrontarse ante posibles agresións nas súas vidas diarias.
“Ao ser muller sempre estás máis exposta por desgracia ás agresións, entón practicar este deporte dáche moita seguridade. Tamén psicolóxicamente ao ir pola rúa de noite ou o que sexa”, engade Sofía.
Sofía Estévez: “Ao ser muller sempre estás máis exposta por desgracia ás agresións, entón practicar este deporte dáche moita seguridade”
As súas compañeiras de club coinciden con ela completamente. “Perdes o medo”, resume Aroa Varela. Para ela adestrar en grappling “da ese respeto que todos deberiamos ter. No colexio, se calquera compañeiro venche molestar e sabe que practicas este deporte, ao mellor xa non te molesta tanto”, sinala acertadamente. “Aínda que non sexa para ningún tipo de agresión”, puntualiza, ter estes coñecementos aporta seguridade e autoridade.
O seu adestrador, David Graíño, engade que “no caso dunha agresión a unha muller, moitas son sexuais desgraciadamente e para que haxa este tipo de agresión ten que haber contacto, co cal, entra no noso terreo”. O técnico explica cómo cada día practican técnicas de defensa e aprenden novas habilidades de grappling. “Esa práctica diaria fai que te vexas en situacións o máis preto da realidade posible. O outro non me dirá o que vai facer, senón que o fai”.
Jenni Rodríguez: “Ter que estar activa tanto física como mentalmente en todo momento axuda bastante, porque nunha situación na rúa non sabemos o que te vai facer outra persoa”
De feito, este foi un dos motivos polos que Sofía decidiu adentrarse no mundo dos deportes de contacto e máis concretamente no grappling. Jenny Rodríguez coincide na utilidade de practicar agresións de contacto continuamente. “Ter que estar activa tanto física como mentalmente en todo momento axuda bastante, porque nunha situación na rúa non sabemos o que te vai facer outra persoa. Se te ves así nunha situación na rúa non podes quedarte pensando que fará o outro agora. Tes que reaccionar, simplemente limitarte a reaccionar. É o que pasa no ximnasio”, analiza.
Seguridade física e mental da man do grappling
Karin Rúas súmase tamén a este razoamento e recorda que o grappling “faite sentir máis segura tanto a nivel físico como mental. Sobre todo a nivel mental. Axúdate a autoesixirte. Cada día aprendes cousas novas, habilidades novas, coñeces os teus límites”.
Por iso, tal e como recomenda Paula Annicchiarico, apuntarse a este deporte vai facer “que teñas máis seguridade e vaste sentir máis orgullosa contigo mesma. É o que diciamos antes, pola rúa tamén te sintes máis segura”. Como ben sinala, simplemente é cuestión de “ir probar”.
