A pasada fin de semana do 5 e 6 de decembro, Castellón foi o anfitrión do Trofeo Internacional Castalia de natación, unha competición na que as marcas foron válidas para os próximos Xogos Olímpicos. Neste torneo Paula Otero, do Club Natación Arteixo, representou á Selección Española e acadou dúas medallas e dúas mínimas.
Otero, nadadora junior, logrou unhas marcas que lle servirán para o Campionato de Europa Junior, que deberá refrendar en marzo, no Campionato de España Open de Primavera. En total, a deportista participou en catro probas.
As marcas de Otero en 400 e 800 libre permítenlle entrar no europeo
En 400 libre logrou a prata, unha distancia na que fixo a Mellor Marca Galega de 16 anos, cun tempo de 4.15.31 e asinando a marca mínima para o europeo. A nadadora repetiu marca para o mesmo campionato en 800 libre, na que quedou quinta.
Ademais, tamén competiu no 200 libre, quedando en terceira posición, e no 400 estilos, na que rematou no sétimo posto.
Por parte do Club Natación Arteixo competiu en 100 braza a veterana Noelia Gómez, acadando o 20ª posto na competición e moi boas sensacións competitivas.
María de Valdés acada a cuarta posición en 400 e 1.500 metros libres
O CN Liceo e o C. Fluvial de Lugo tamén tiveron representación no campionato. Por parte do club coruñés, María de Valdés competiu para a Selección Española en 1.500 metros libres. Nesta competición acadou a cuarta posición, asinando un tempo de 16:44.55, só uns segundos por detrás da gañadora, Mireia Belmonte.
Repetiu posición en 400 metros libres, cunha marca de 4:19.11. Na categoría de 800 metros libres, onde tamén competiu, os resultados foron algo peores, logrando un sétimo posto cun tempo de 8:52.70, algo por detrás de Paula Otero.
Por parte do equipo lucense, Ana Cernadas competiu en 200 metros libres, acadando a sexta posición.
