Sen dúbida, o 2020 foi un ano marcado pola pandemia de COVID-19 que afectou a todos os ámbitos das nosas vidas e, inevitablemente, tamén ao deportivo. Máis aló das grandes competicións e dos deportes máis tradicionais, o coronavirus tamén tivo repercusións noutras disciplinas. É o caso do grappling, unha loita da que David Graíño é adestrador dun ximnasio que leva o seu propio nome.
Nestes últimos anos, esta práctica deportiva está a ser cada vez máis coñecida, e o adestrador, que leva máis de dúas décadas loitando, recorda que antes da pandemia “nunca desfrutara da miña locura con tanto alumnado”.
Todo cambiou no 2020. “O balance deportivo foi bastante malo”, recoñece Graíño. O grappling é unha modalidade de loita que se basea completamente no contacto. O seu nome significa en inglés aferrar, polo que levalo a práctica respectando as medidas de seguridade sanitaria é practicamente imposible.
As complicacións para adestrar e o medo ao contaxio diminuiu o número de licenzas expedidas para realizar grappling, pero Graíño recorda que “seguindo os protocolos da Federación e da Xunta, non tivemos ningún contaxio no club”.
Esta é a parte máis importante e positiva da situación actual. No Ximnasio Graíño están todas e todos saudábels e o peor “foi non poder adestrar durante meses, que foi moi duro para os que nos gusta tanto a loita”, comenta o experto.
Plans de futuro
Non todo é negativo. Como nota alegre, as perspectivas de futuro para o Ximnasio Graíño son boas. No 2020 abriron unha nova filial do equipo en Ferrolterra e para o novo ano están traballando en volver a ter presenxa en Carballo e comezar en Larancha.
“Con A Coruña, Arteixo e O Barco de Valdeorras serán seis puntos onde adestrar en Galicia co noso equipo”, sinala o técnico. Os obxectivos seguen claros: “Desexamos crecer e seguir expandendo a práctica dos nosos deportes”, recorda.
“Ao 2021 pedímoslle saúde, unha vacina efectiva e volver desfrutar con todo o noso alumnado como antes da pandemia”, remata Graíño.
