Só faltan catro xornadas para que finalice a primeira fase da Primera Nacional, e o PM Friol perfílase como favorito para o ascenso despois dunha goleada ao colista, o SD Villestro. Con todo, semella que o líder do grupo 1 non quedará definido ata os últimos duelos.
O Viajes Interrías aférrase á segunda posición, malia non vencer desde o 13 de febreiro, e sumar un novo empate no seu último partido, ante o Victoria CF. O outro Victoria, o de Santiago de Compostela, venceu nun encontro ante un rival directo, o Sporting de Gijón B, sumando para soñar con saír do pozo.
No resto de equipos galegos, empate do Umia CF ante o Olímpico vitoria para o UD Mos, ante o Sárdoma CF, que se mantén na terceira praza, e derrota do filial do Dépor ABANCA, que caeu ante o Real Oviedo B.
Goleada do Friol a costa do Villestro
O campo da Reigosa foi un festival de goles na 22ª xornada da Primera Nacional. O conxunto local, o PM Friol, desfrutou en casa, onde recibía ao colista, o SD Villestro (6-0).
O partido comezou de cara para as locais, que xa no minuto 10 se adiantaban cun gol de Alicia Martínez, a pichichi da competición. Pouco houbo que agardar para o segundo tanto do Friol, que chegou tamén da bota da dianteira no minuto 16.
O Villestro, tocado e sendo o equipo máis goleado da categoría, víase xa sen poucas opcións de puntuar. As lucenses seguiron dominando con tranquilidade o encontro, pero sen conseguir transformar con facilidade as súas chegadas á área contraria. Con todo, o terceiro gol chegaría pouco antes do descanos, no minuto 41, obra de Sara Cobollo.
Na segunda metade, o festival de goles do Friol non parou de aumentar. A só dous minutos da reanudación, Yuki fixo o 4-0, decantando aínda máis o marcador para o cadro local.
A Reigosa desfrutou das súas ata os minutos finais do encontro, con dous goles máis grazas ás Anas. Valle anotaría no 76 e Bonilla no 85, para sentenciar por completo un 6-0 e 3 puntos que afianzan ao Friol como líder do grupo 1.
Empate que sabe a pouco para o Interrías ante o Victoria CF
O segundo posto da clasificación está ocupado por un Viajes Interrías que leva sen vencer desde o 13 de febreiro, na recuperación da 16ª xornada ante o UD Mos.
Na última fin de semana de competición, o seu rival foron as cebras do Victoria CF, que está acomodado na zona media da táboa clasificatoria.
O partido, celebrado en terras coruñesas, deu mostra dunha igualdade entre os dous equipos que non reflicte a táboa. O marcador non se estrou ata o minuto 35, cando Natalia de Francisco anotou o 0-1 para o Interrías.
As visitantes aguantarían o resultado ata o descanso, afrontando a segunda parte co luminoso ao seu favor. Na segunda metade, ningún dos equipos se facía co dominio do xogo, e non se xeraban ocasións claras de gol no verde.
Con todo, o Victoria CF apretaba e o seu premio chegou no 68, cun gol de Andrea Merino. Coas táboas no marcador e uns vinte minutos para o remate do partido, a tensión palpábase no céspede. Pouco antes do pitido final, Alba Suárez fixo o 2-1 para as cebras, pero o Interrías non se quedaría atrás. Cun gol no 90 de Botelho, as visitantes puxeron o empate e o duelo quedaría en reparto de puntos.
O 19 de marzo o Interrías terá unha nova oportunidade, recuperando o duelo ante o Sárdoma CF da 17ª xornada.
O Victoria FC suma de 3 ante un rival directo no pozo
Unha das vitorias máis importantes da xornada estivo no duelo entre o Victoria FC e o Sporting B, un duelo directo entre dous equipos que loitan por deixar atrás o descenso. As santiaguesas lograron vencer por un 3-0, dando unha gran imaxe no seu campo.
O conxunto vermello xerou ocasións de principio a fin e impúxose ante o filial asturiano, que loitou ata o final polo resultado. A base de insistencia, o primeiro gol das locais entrou na portería rival no minuto 27, despois dunha gran xogada combinativa que remataba nun pase de Lau a Ánxela. O segundo gol subiría ao marcador pouco despois, á borde do descanso, tamén grazas ao xogo coral do cadro galego.
Na segunda metade, as visitantes volveron ao céspede de Santa Isabel con forza, pero o Victoria FC impoñía o seu xoog. O terceiro tanto chegaría no 72, grazas a Alba, froito dunha xogada con Ánxela.
Con este resultado, as compostelás apuran as súas opcións de manter a categoría nesta tempada.
Vitoria do UD Mos ante o Sárdoma
Outra das citas galegas enfrontou á UD Mos ante o Sárdoma nas Relfas, nun encontro con pouco xogo nas áreas, que se decidiu cun gol tempraneiro das visitantes.
O UD Mos anotou no 16 das man de Paula González, un solitario gol que subiría ao marcador e xa non mudaría o resultado. O Sárdoma, terceiro clasificado, loitou para puntuar na casa, pero as visitantes aguantaron a presión para levarse os tres puntos.
Empate do Umia CF
Nesta xornada, o Umia CF recibía en casa ao Olímpico de León, nun duelo que se resolveu por un empate 2-2.
As visitantes golpearon primeiro, cun tanto no minuto 10 de Emma Pérez. Co resultado en contra, as galegas prepararon a remontada, dando o primeiro paso no miuto 40, cun gol de Nuria Torres que igualaba o marcador.
Na segunda parte, a igualdade seguía sendo máxima no campo galego, e por cada ocasión das visitantes, as locais respostaban. Tamén foi así nos goles. Noa Alonso fixo o 2-1 no 63, pero Aroa Caño respondía cinco minutos despois co 2-2.
O partido non rompeu o equilibrio, e finalmente habería reparto de puntos para os dous conxuntos.
Derrota do filial branquiazul
O equipo B do Dépor ABANCA tamén sufriu unha derrota nesta xornada, na súa visita a un rival directo, o Oviedo Moderno B (4-1).
As de Kevin Cabado sumarían un solitario gol grazas a María Calvo, que anotou no minuto 47. Con todo, os goles de Rocío Muñiz, quen fixo un hat trick, e o de Rebeca Oliveira para rematar o partido, decantarían o duelo para as asturianas.
