Lucas Mondelo xa fixo pública a lista de xogadoras convocadas coa Selección Española para a concentración de febreiro, e entre as elixidas están tres galegas: Paula Ginzo, Raquel Carrera e María Araújo.
Esta preparación celebrarase do 2 ao 7 de febreiro en Francia, concretamente na localidade de Toulouse. Durante eses cinco días, o equipo de baloncesto traballará nos adestramentos e con dous amistosos contra a Selección Francesa. Ambos países son os organizadores da competición europea deste ano.
A Selección ten a vista posta nas competicións internacionais do verán
O combinado estatal contará cun total de 14 xogadoras, ademais das galegas (Ginzo, Araújo e Carrera) que ocupan todas a posición de ala-pívot. Esta xuntanza será a segunda preparación das españolas de cara ás competicións do verán. O EuroBasket, que se celebrará en Valencia e os Xogos Olímpicos de Toquio.
“Esta concentración será a última que realicemos antes da xira do verán. O obxectivo é preparar ao equipo para o EuroBasket tan ilusionante que teremos en xuño e para os Xogos Olímpicos de Toquio de xullo e agosto”, aclarou o adestrador, Lucas Mondelo.
Os partidos contra as galas serán o venres, 5 de febreiro, ás 21:00 horas e o domingo, 7 de febreiro, ás 18:00 horas. Ambos poderán seguirse en directo en Teledeporte.
Para respectar os protocolos sanitarios, a concentración da Selección realizarase en modo burbulla e xogadoras e corpo técnico realizarán varias probas PCR antes e depois da convocatoria así como durante a mesma.
Este é o listado completo de convocadas:
- Maite Cazorla, do Perfumerías Avenida
- Silvia Domínguez, do Perfumerías Avenida
- Laia Palau, do SPAR Girona
- Leo Rodríguez, do Perfumerías Avenida
- Andrea Vilaró, do Perfumerías Avenida
- Belén Arrojo, do Lointek Gernika
- María Conde, do USK Praga
- Laura Quevedo, do Kutxabank Araski
- María Arújo, do SPAR Girona
- Raquel Carrera, do Valencia Básket
- Paula Ginzo, do Lointek Gernika
- Nogaye Lo, do Lointek Gernika
- Astou Ndour, do Hatay
- Laura Nicholls, do Casademont Zaragoza
👏👇@Maria_Araujo8 @Pauginzo @raquelcarrera_ https://t.co/oD9mA6xHrq
— FGB (@FGB_Baloncesto) January 28, 2021
