O Campionato de España de Clubs Copa Joma e Copa Iberdrola celebrarase o 11 de febreiro na pista cuberta na Fundación Expourense baixo a organización da Sociedad Gimnástica de Pontevedra. Trátase dunha das primeiras competicións por equipos da tempada de atletismo.
Ademais de organizar este campionato, a entidade pontevedresa terá a ocasión de competir tanto en categoría masculina, como feminina, en calidade de invitados. As e os atletas da Sociedad Gimnástica de Pontevedra terán a oportunidade, por tanto, de enfrontarse aos mellores atletas e clubs do panorama estatal.
En categoría masculina é un gran test de nivel para as ligas. Para as mulleres, será unha boa situación para verse as caras con algúns dos mellores equipos no ámbito estatal.
En categoría masculina os atletas da Sociedad Gimnástica de Pontevedra enfrontaranse ao Playas de Castellón, o FC Barcelona, o Atletismo Numantino, o Fent Cami Mislata, o Cueva de Nerja, a Real Sociedad e o Unicaja.
Na categoría feminina as atletas do Sociedad Gimnástica de Pontevedra competirán contra o Valencia Club de Atletismo, o Playas de Castellón, o FC Barcelona, o At. San Sebastián, o Grupoempleo Pamplona, o Avinent Manresa e o Cueva de Nerja.
Por cada categoría competirán un total de oito clubs. Todos eles loitarán para converterse nos mellores clubs baixo teito e levantar a primeira copa colectiva da tempada 2023.
