A Liga Feminina Endesa ven de facer pública a lista de candidatas aos premios desta tempada 2020-2021, e nela hai dúas xogadoras representando a Galicia. Trátase de Vega Gimeno, xogadora do Durán Maquinaria Ensino, con dúas candidaturas, e María Araújo, galega do SPAR Girona, cunha categoría.
A primeira delas, Gimeno, opta a ser premiada como a mellor ala-pívot do presente curso. Nesta categoría compite contra Katie Lou Samuelson, do Perfumerías Avenida, e Celeste Trahan-Davis, do Valencia Basket Club.
Ademais, a baloncestista do club lucense tamén é candidata ao premio á mellor MVP nacional, proposta xunto con Cristina Ouviña, do Valencia Basket Club, e Laura Quevedo, do Kutxabank Araski.
Por outra parte, a viguesa María Araújo é a posible revelación nacional, categoría na que compite con Maite Cazorla, do Perfumerías Avenida, e con Laia Flores, do Campus Promete.
Podes votar polas xogadoras de Galicia nesta ligazón.
Os números de Gimeno e Araújo
Na presente tempada, tanto Gimeno como Araújo están a facer grandes números. Na listaxe de maiores anotadoras, Vega Gimeno é a oitava xogadora máis efectiva fronte ao aro, cunha media de 14,42 puntos por partido, sendo ademais a mellor xogadora española nesta categoría.
Entre este e outros datos, como estar entre as maiores anotadoras desde os tiros de dous e ser a número 1 na liña de tiro libre, Gimeno é ademais a quinta xogadora mellor valorada, acumulando 447 créditos valorativos neste momento da competición.
Pola súa parte, Araújo entra nas 15 primeiras, cunha media de 13,93 puntos de valoración por partido. A galega foi ademais recentemente recoñecida co MVP do último partido do seu equipo.
