Entre as incorporacións do Durán Maquinaria Ensino Lugo, está Georgina Bahí. Na súa primeira comparecencia ante os medios locais, a xogadora confesaba que “o feito de ter traballado previamente con Miguel Ángel Ortega foi un factor importante para vir aquí”. Tamén o coñecemento doutras xogadoras coas que tiña coincidido como Tamara Abalde.
Consultada pola súa imaxe previa do Durán Maquinaria Ensino de Lugo Georgina Bahí dixo que o equipo galego vese desde fóra como: “Un club que vai facendo as cousas ano tras ano con boas plantillas e bo traballo. É un club no que se pode traballar. Familiar. Un lugar no que todos imos a unha á procura de que o club medre un pouco máis”
Georgina Bahí: “Estamos construíndo o equipo e temos claro o que queremos”
Ao respecto do traballo que se está a facer nesta pretempada Georgina Bahí explicaba que se está “construído o equipo. Temos claro o que queremos diante e detrás. É importante tamén coñecérmonos todas. Agora é tempo diso”, explicaba a xogadora.
Sobre a súa adaptación á cidade de Lugo e ao Durán Maquinaria Ensino de Lugo, dixo que estaba a ser “moi boa tanto ao equipo como á cidade. Xa coñecía a moitas xogadoras de compartir vestiario ou enfrontarme a elas e iso fai que todo sexa moito máis fluído”
Para Georgina Bahí está claro que un dos objetivos é “estar na EuroCup este ano”
O técnico, Miguel Ángel Ortega, manifestaba sobre a deportista que é unha “xogadora que ten moitos rexistros tanto en ataque como en defensa. Conta cun gran coñecemento do xogo e iso fai que xogue ben e sobre todo que faga xogar mellor ás súas compañeiras. Iso é un valor engadido. A súa versatilidade. Ten xogo exterior e interior”.
“Para min foi unha sorpresa que non continuase no seu equipo. Enseguida empezamos a negociar para intentar que viñese ao Ensino”, explicaba Miguel Ángel Ortega, o seu novo adestrador.
