O Durán Maquinaria Ensino segue reforzando o seu plantel cara a tempada 2021/2022. A última incorporación é Georgina Bahí, procedente do Cadí La Seu, equipo do que era capitá e co que competiu durante oito anos.
A ala-pivote catalá chega ás filas do club lucense con 12 anos de experiencia ás súas costas na máxima categoría do baloncesto español, agora denominada Liga Feminina Endesa. Bahí pasou polos bancos do Segle XXI, o Femení Sant Adriá, o Uni Girona e o Ciudad de Burgos, ademais do xa mencionado Cadí La Seu. Durante a súa capitanía, o equipo catalán debutou na EuroCup.
A xogadora de 1,90 cm e natural de Girona foi a máxima anotadora desde a liña de tres para o club catalán. Ao longo da liga regular, Bahí anotou 31 triplos, cunha media de 37,8 puntos por partido. Nas cifras xerais da competición, a baloncestista tivo un promedio de 6,3 puntos, 2,3 rebotes e 5,5 créditos valorativos disputando unha media de 22 minutos por encontro.
No apartado internacional, a pivote foi unha das pioneiras do 3×3, disputando o Preeuropeo e o Europeo do 2014. Nas últimas tempadas formou parte da Selección Española en dez ocasións co 5×5, participando nos dous últimos Europeos, do 2017 e o 2019.
Bahí vai convocada coa Selección 3×3
A representación do baloncesto galego na Selección Española do 3×3 aumenta con esta nova fichaxe do Ensino. A deportista formará parte do equipo seleccionado por Junyer para preparar o Preolímpico. Nesta concentración encontrarase coa súa nova compañeira Helena Oma.
Marta Canella e Helena Oma, representación galega na Selección 3×3
