Hoxe, sábado, 1 de abril, ás 19:00 horas no Palacio dos Deportes de La Rioja enfrontaranse o Grafometal La Rioja e o Conservas Orbe Rubensa Bm Porriño. O encontro corresponde coa vigesimoprimera xornada da liga Guerreras Iberdrola. O encontro será dirixido polos colexiados da Federación Navarra de balonmán, Raúl Oyarzún e Aritz Zaragueta. O partido transmítese pola canle de YouTube do Grafometal Sporting La Rioja.
En canto ao rival, o Grafometal La Rioja que prepara Juanjo González, perdía na última xornada co Atticgo Bm Elche (23-31) o pasado mércores 29. O equipo rioxano está situado na última posición da clasificación cun total de sete puntos. É o pechacancelas. Ten acadados un empate, tres vitorias e perdeu o resto dos seus compromisos ligueiros. Suma 439 goles a favor e 557 en contra. As súas máximas goleadoras en liga son Gema Trujillo e Blanca Benítez con 59 e 57 goles respectivamente.
Pola súa banda, o Conservas Orbe Rubensa Bm Porriño non puido co Super Amara Bera Bera na xornada 20, na que o equipo donostiarra foi moi superior (31-18). As porriñesas atópanse cuartas na liga Guerreras Iberdrola con 23 puntos na súa conta persoal.
Tras a derrota en terras vascas, o equipo dirixido por Ismael Martínez busca sumar dous puntos moi importantes fose de casa: “imos tentar sacalo, aínda que é un partido moi complexo e volvemos viaxar fóra”. Con ese triunfo, as galegas do Conservas Orbe Rubensa Bm Porriño asentaríanse un chisco máis na cuarta posición da táboa na Liga Guerreras Iberdrola.
O Grafometal La Rioja que prepara Juanjo González, como ben explica Ismael Martínez, “seguramente sexa o equipo que máis mellorou. A verdade que está a facer unha segunda volta espectacular que gañou a equipos como Rocasa e reforzouse moitísimo”.
O adestrador do equipo galego recalca a importancia de acadar unha vitoria no Palacio dos Deportes ante o o Grafometal La Rioja: “Para nós son puntos craves e se somos capaces de sumalos creo que estariamos xa nesa loita pola cuarta praza”.
“Temos que estar serias e facer un bo partido. Creo que temos que estar ao noso mellor nivel para poder gañar nunha pista que, agora mesmo, é de é das máis complicadas”, concluía Ismael Martínez na previa do partido.
A este choque o Conservas Orbe Rubensa Bm Porriño chega cuarto con 23 puntos. Leva sumadas 11 vitorias, un empate e oito derrotas. Atesora 522 goles a favor e 507 na súa contra. As súas máximas artilleiras son na Liga Guerreras Iberdrola, a internacional arxentina Micaela Casasola, que é tamén a máxima goleadora de competición con 129 goles, e Malena Valles con 87 dianas, que é quinta no ránking goleador da DHF.
Na primeira volta o BM Porriño gañou ao Grafometal
A última vez que se viron as caras ambas as dúas escuadras foi na xornada 10 da Liga Guerreras Iberdrola onde o conxunto dirixido por Ismael Martínez venceu ás rioxanas 26-21 nun encontro marcado pola grave lesión da pivote do conxunto rioxano, Dada Bosnjak, ao pouco de comezar o encontro. Daquela, e pese á baixa de Bosnjak, as rioxanas mantivéronse fortes e o partido decidiuse nos dez últimos minutos, no minuto cincuenta o marcador reflectía un axustado 22-21.
Na primeira volta foi a experiencia e as táboas do conxunto galego o que fixo que os dous puntos quedasen no Porriño. As máximas goleadoras daquel encontro foran Malena Vales, Sarai Samartin e Paulina Buforn con media ducia de goles cada unha.