Galicia terá sete atletas olímpicos en París 2024 e cinco son mulleres

O atletismo galego iguala en París 2024 o seu tope histórico con sete atletas olímpicos dos cales cinco son mulleres

Xa é oficial, un total de sete atletas e dúas xuizas serán os que representen ao atletismo galego nos vindeiros Xogos olímpicos de París 2024. A Real Federación Española de Atletismo convoca a 57 atletas para esta competición dos cales 31 son mulleres e 26 homes, superando así a participación española feminina a masculina na gran cita do deporte por excelencia. Deses 57, sete son galegos e cinco delas, mulleres.

Yulenmis Aguilar, lanzadora xavelina / YULENMIS AGUILAR IG

A lista que era anunciada polos responsables da Real Federación Española de Atletismo, confirmaba o máxino número de atletas posibles ca inclusión finalmente de Yulenmis Aguilar no concurso de xavelina que foi dúbida pola súas molestias no ombreiro ata última hora.

Xunto a Yulenmis Aguilar estarán na capital francesa a campioa europea indoor e bronce olímpico en Toquio e campioa de España Ana Peleteiro no concurso de triplo salto; o campión de europa indoor dos 800 m. Adrián Ben; a subcampioa de España dos 10.000 marcha Antía Chamosa na proba de maratón por relevos mixtos; a finalista europea e campioa de España Belén Toimil en lanzamento de peso e a dobre presenza galega na proba de maratón por parte dos campións de España da modalidade Ester Navarrete (campioa de España) e Tariku Novales.

A maiores, están designados pola World Athletics as xuízas internacionais Loreto Pérez quen debuta nuns Xogos Olímpicos e Dolores Rojas que suma nada menos que a súa cuarta participación logo de Atenas-2004, Londres-2012 e Toquio-2020.

Mar Barcón moderou o debate de xuízas e árbitras do ciclo 'Deporte para a Igualdade' do Concello da Coruña que contou coa participación de Teresa Martínez (hóquei a patíns), Dolores Rojas (atletismo), Zeltia García (ximnasia artística feminina), Paula Lema (baloncesto) e Rubén Eiríz (fútbol) / AS NOSAS — Dolores Rojas, xuíza de atletismo, á primeira pola esquerda / AS NOSAS

Galicia alcanza os 50 atletas olímpicos no rexistro histórico

Segundo informa a Federación Galega de Atletismo, “con esta importante presenza, o atletisgo galego confírmase como unha das federacións galegas con maior número de deportistas en París igualando o seu maior rexistro histórico que data de Barcelona-92 na que estiveron participando Alejandro Gómez, Estela Estévez, Carlos Adán, Carlos de la Torre, Angeles Barreiro, David Varela e Julián Sotelo”.

Explican desde a Federación Galega de Atletismo que “ademáis na capital francesa acádarase o número redondo de 50 participacións de atletas galegas e galegos nas distintas edicións nas que Carlos Pérez (Roma-60,México-68, e Munich-72) Alejandro Gómez (Seoul-88, Barcelona-92 e Atlanta-96) e Alessandra Aguilar (Beijing-02, Londres-12 e Rio-16) son os que máis participacións acumulan”.