- Galicia contou con sete mundialistas en Budapest: María Bernabéu, Laura Martínez, Sara Álvarez, Estrella López, Nikoloz Sherazadishvili (medalla de ouro), Francisco Garrigós (bronce) e Alberto Gaitero. Catro deles, estarán en Toquio 2021.
O secretario xeral para o Deporte, José Ramón Lete Lasa, participou no tatami do Centro Galego de Tecnificación Deportiva (CGTD) na homenaxe realizada aos deportistas de Galicia que veñen de competir no Mundial de Budapest: Nikoloz Sherazadishvili, Francisco Garrigós, Alberto Gaitero, María Bernabéu, Laura Martínez, Sara Álvarez e Estrella López. No acto estiveron presentes todos menos Estrella López por motivos deportivos e foi dirixido polo presidente da Federación Galega de Judo, Mario Muzas.
Nas súas verbas, Lete Lasa dirixiuse a cada un dos judokas destacando, de todos eles, a súa disciplina, calidade e capacidade de superación, referíndose particularmente a Sara Álvarez xa que unha lesión volve a apartala do soño olímpico.
Do mesmo xeito mandou unha mensaxe de cariño e apoio as outras dúas judokas con licencia galega que se quedan ás portas da clasificación olímpica como Estrella López e Laura Martínez, da que destacou a súa mocidade e asegurou que chegará en plena forma a París 2024.
No que atinxe aos catro judokas con licencia galega que acudirán a Toquio, o secretario xeral para o Deporte, José Ramón Lete Lasa, recoñeceu o traballo de María Bernabéu, da que dixo ser a pioneira desta brillante xeración de judokas galegos.
O secretario xeral para o Deporte recoñeceu o palmarés de Alberto Gaitero e Francisco Garrigós, especialmente polas súas últimas medallas colleitadas como o bronce de Fran en Budapest.
Por último dirixiuse a Niko Sherazadishvili como “o único judoka español bicampión mundial e a nosa enorme esperanza”.
Galicia supón o 57% da representación española de Judo en Toquio
Estes catro judokas olímpicos con licencia galega representan o 57% da delegación española de judo que competirá nos Xogos de Toquio, cun total de sete deportistas. José Ramón Lete Lasa celebrou a decisión de todos eles de competir por Galicia e recoñeceu o traballo da Federación Galega de Judo que “ten moito que ver en xuntar aos mellores judokas en Galicia”.
Por último, o mandatario galego dirixiuse aos 15 rapaces e rapazas que practican judo no Centro Galego de Tecnificación Deportiva grazas ás bolsas da Xunta (10 en tecnificación e 5 en rendemento) e aseguroulles que no futuro serán eles os homenaxeados.
