Os FutsalPlanet Awards premian cada ano as mellores xogadoras do fútbol sala internacional. Na edición 2020 aparecen, unha vez máis, nomes de xogadoras e clubs relacionados con Galicia. Nesta ocasión o Pescados Rubén Burela está entre os equipos candidatos a gañar o premio ao mellor club, e Caridad García, do Poio Pescamar, está nominada ao galardón á mellor porteira do mundo.
O nivel do fútbol sala feminino galego está fóra de toda dúbida. Contamos con cinco equipos na máxima categoría (Burela, Poio, Envialia, Cidade de As Burgas e Viaxes Amarelle FSF), é galego o actual campión de Liga e de Copa (Burela), e xustamente acaban de protagonizar dous clubs da nosa comunidade a final da Copa da Raíña, por non falar de que están a piques de xogar a final da SuperCopa (Burela vs Poio)
O cinco contra cinco galego é recoñecido no ámbito estatal, pero tamén no internacional. Unha proba diso é que nos premios da publicación Futsal Planet aparecen xogadoras e clubs. No caso dos equipos as Guerreiras Laranxas do Pescados Rubén Burela as da Mariña aspiran a conseguir o galardón a mellor equipo, que a publicación entrega por primeira vez para categoría feminina na súa 21ª edición dos premios.
Na lista de 10 clubs femininos de fútbol sala aspirantes están
- FC Aurora Saint Petersburg (Russia)
- Sport Lisboa e Benfica (Portugal)
- Budstar FSF (Ukraine) (Cobra-NPU)
- Club Deportivo Burela Fútbol Sala (Spain)
- C. D. Futsi Atlético Navalcarnero (Spain)
- Associação Leoas da Serra (Brazil)
- Mes Rafsanjan FC (Iran)
- Montesilvano Femminile C5 (Italy)
- SWH Ladies Nishinomiya Futsal Club (Japan)
- Futsal Feminino Taboão da Serra (Brazil)
Son así dous conxuntos da Primeira División do FutSal español os que están incluídos na lista, o Burela e o Futsi At. Navalcarnero. So Brasil suma dous conxuntos na lista deste Top10 (FSF Taboão da Serra e Associação Leoas da Serra)
Caridad, na lista de mellores porteiras do mundo
No caso da mellor cancebeira do cinco contra cinco internacional a publicación Futsal Planet entrega o galardón desde o ano 2015. Nas cinco edicións previas levou o premio unha gardamallas española. Nesta ocasión está nominada a xogadora andaluza do Poio Pescamar, Caridad García (Sanlúcar de Barrameda, 1999).
Gañadoras previas do premio Best Female Goalkeeper in the World
- 2019 -> Silvia Aguete Outón (ESP)
- 2018 -> Ana Catarina Silva Pereira (POR)
- 2017 -> Estela García Rodero (ESP)
- 2016 -> Belén De Uña Marzo (ESP)
- 2015 -> Belén De Uña Marzo (ESP)
A pontevedresa Silvia Aguete, tamén do Poio Pescamar, é a actual gañadora e quedou segunda nos premios do ano 2018, o único que levou unha porteira non española (a lusa Ana Catarina). Esta edición, as lesións limitaron o seu concurso co Poio.
As gardamallas que foron nominadas nesta 21ª edición dos Futsalplanet Awards 2020 (obviamente os clubs son nos que xogaron en 2020) son:
- Ana Carolina Caliari Sestari (BRA/ITA) Montesilvano C5 Femminile (ITA) – ITALY N.T.
- Ana Catarina Silva Pereira (POR) Sport Lisboa e Benfica (POR) – PORTUGAL N.T.
- Caridad García Díaz (ESP) Poio Pescamar F. S. (ESP) – SPAIN N.T.
- Angelica Dibiase (ITA) Città di Falconara (ITA)
- Patrícia Moraes Faria “Giga” (BRA) Associação Female Futsal Chapecó (BRA)
- Anastasia Ivanova (RUS) FK Aurora Sankt-Peterburg (RUS)
- Zeinab Karami (IRN) Mes Rafsanjan (IRN)
- Marta Balbuena Navas (ESP) C.D. Futsi Atlético Navalcarnero (ESP) – SPAIN N.T.
- Regiane Fernanda Silva Do Amaral (BRA) Leoas da Serra (BRA) – Stein Cascavel Futsal Feminino (BRA)
- Ayaka Yamamoto (JPN) SWH Ladies Futsal Club (JPN)
