Na lista de deportistas recoñecidos que vén de facer pública a Xunta de Galicia destacan novas deportistas galegas de alto nivel (DGAN) como María del Pilar Barros, campioa do Mundo de vídeo submariño; Estrella López Sheriff en judo ou Ferenc Szabo como adestrador de halterofilia.
O Diario Oficial de Galicia vén de publicar a resolución do 26 de maio de 2023 pola que se recoñecen as persoas deportistas de alto nivel (DGAN), alto rendemento e rendemento deportivo de base de Galicia e diferentes colectivos deportivos, así como as solicitudes desestimadas e a causa. En total, das 109 novas solicitudes presentadas, son 77 -o 71%- os recoñecidos.
Entre estes nomeamentos destacan novos deportistas galegos de alto nivel (DGAN) como Jorge Candán e María del Pilar Barros, campións do Mundo de vídeo submariño; Noel Domínguez en piragüismo; Adrián Mosquera en piragüismo (paracanoe); Estrella López Sheriff en judo; Ferenc Szabo como adestrador de halterofilia; ou Nico Rodríguez que se suma á lista de deportistas galegos de alto nivel vitalicios.
Con esta última resolución publicada no DOG a comunidade galega alcanza xa os 866 deportistas recoñecidos (333 mulleres e 533 homes), divididos en 709 de alto nivel DGAN (270 mulleres e 439 homes), 53 de alto rendemento (22 mulleres e 31 homes), 72 de rendemento deportivo de base (27 mulleres e 45 homes), 14 técnicos (3 muller e 11 homes), 4 árbitros (3 mulleres e 1 home), 5 xuíces (4 mulleres e 1 home) e 9 vitalicios (4 mulleres e 5 homes). Entre os 866 deportistas recoñecidos, cómpre salientar un total de 26 deportistas con diversidade funcional (10 mulleres e 16 homes) que representan o número máis alto da serie histórica. Con todo, Galicia acada con esta resolución o seu récord de deportistas recoñecidos en todas as categorías e tamén de deportistas galegos de alto nivel.
Cómpre lembrar que o novo decreto de alto nivel, de alto rendemento e de rendemento deportivo de base publicado polo DOG o pasado 29 de setembro de 2020, recoñece novas figuras como o alto rendemento deportivo (práctica deportiva que aínda non pode ser cualificada de alto nivel pero cuxa proxección indica que estará en condicións de selo) e o rendemento deportivo de base (etapa de desenvolvemento e perfeccionamento previa a acadar o alto rendemento deportivo ou o alto nivel).
O mesmo ocorre coas categorías de técnicos – adestradores e xuíces – árbitros, novos colectivos que se incorporan a figura do alto nivel, a través da Comisión Galega de Avaliación do Alto nivel deportivo.
