A loita galega segue medrando e demostrando o seu gran nivel. O equipo feminino da Federación Galega de Loita, que acudiu ao Campionato de España Sénior de Loitas Olímpicas, proclamouse subcampión estatal en Loita Feminina.
En total participaron nove loitadoras, que volveron cun balance de dous ouros e dúas pratas. A proba celebrada no CAR Infanta Cristina dos Alcázares de Murcia deixou como campioas a Lydia Pérez, do Loita Pontevedra, e Noelia Lalín, do Keltoi. As pratas foron para Nerea Pampín, tamén do Keltoi, e Cristina Rodríguez, do San Ignacio.
O resto de loitadoras quedou da seguinte forma na competición de Loita Feminina:
- Alina Gradinaru, do Ayude – 11ª
- Aimara Osco, do Ciudad de Vigo – 5ª
- Luana Figueirido, do El Castro – 5ª
- Elisabeth Rodríguez, do San Ignacio – 10ª
- Vanesa Muíños, do San Ignacio – 5ª
Na táboa por clubs de Loita Feminina, o Keltoi foi o segundo galego mellor posicionado, despois da Fegaloita, quedando en quinta posición, con 45 puntos. O seguinte clasificado foi o Loita de Pontevedra, na 13ª posición. Na 18ª praza quedaron o El Castro e o Ciudad de Vigo, e finalmente na 21ª posición estivo o Ayude.
A Selección Galega tamén acada a segunda posición en Loita Libre Olímpica
O equipo da Fegaloita tamén subiu ao podio en Loita Libre Olímpica, acadando a segunda posición do campionato. Destacaron especialmente José Cuba e Damián Iglesias, ambos campións de España absolutos.
De novo, o Keltoi foi o club mellor clasificado entre os galegos despois da selección, quedando na quinta posición. O seguintes na lista foron Club de Loita Sabaris, Club San Ignacio, Club de Loita Vilalba, Club Loita Rábade, Club de Lucha Kuzushi e o Club de Loita Pontevedra.
