As futbolistas de Galicia deron a talla no CESA. A Selección Galega infantil feminina de fútbol sala da RFGF proclamouse subcampioa de España no CESA celebrado en Salou. As futbolistas que adestra a dupla Manuel del Castillo – María Bardanca disputou unha gran final, cunha prórroga de infarto. –As Nosas caeron ante a potente Cataluña cun gol na recta final do tempo extra.
Orgullos@s. ̃
✍️ Salou, 15 de abril de 2022#SentindoGalicia pic.twitter.com/4QvxScfbNW
— RFGF (@futgal) April 15, 2022
A final do Campionato de España de Seleccións Autonómicas (CESA) de fútbol sala feminino para categoría infantil foi un auténtico partidazo. As dúas seleccións, Galicia e Cataluña, utilizaron as súas armas para poder gañar o encontro.
Ao final da primeira parte o electrónico marcaba empate a 1. Amparo Cuñat, unha das grandes protagonistas das cuatribarradas, abriu a lata do marcador nada máis empezar pero, pouco despois, a goleadora e, seguramente a mellor xogadora do campionato, a galega Sara Couso, colocou o empate a 1 no luminoso, resultado co que se chegou ao descanso.
No segundo acto, Cataluña tivo as oportunidades máis claras, xa que Galicia, pese ao perigo que ocasionaba Sara Couso a cada balón que tocaba, inquietou pouco a portería defendida pola catalá Ona Fernández. Si que foi protagonista a porteira galega, que evitou varias ocasións de Cataluña e mesmo parou un penalti lanzado por Vitoria Ramírez.
Con todo, a porteira galega non puido evitar o 2 a 1 de Martina Álvarez. Nunha saída de balón de Galicia, Martina recuperou e espetou un disparo potente para marcar o 2 a 1. Ademais, a Selección Galega quedou cunha xogadora menos pola expulsión de Nuria. Pero outra vez, a de sempre por empatar. E fíxoo a 28 segundos polo final. Sara Couso estableceu o 2 a 2 definitivo co que se chegou ao final dos 30 minutos.
Galicia e Cataluña case chegan aos penaltis
E na prórroga, houbo nervios, goles e vitoria de Cataluña. Na primeira parte do tempo extra, nada pasou. Poucas ocasións, partido trabado e marcador sen goles. Toda a emoción, reservada para os últimos tres minutos.
Aroa González marcou o 3 a 2, pero volveu aparecer Sara Couso desde os dez metros para marcar o empate a 3 xa no último minuto da prórroga. Así, e cando todo o mundo agardaba a resolución polos penaltis, Amparo Cuñat estableceu o definitivo 4 a 3 a falta de 40 segundos para o final.
A Irmandiña infantil de futsalfem quedaba co mel nos beizos nunha finalísima que deixa claro o nivel das nosas tamén nas categorías de base.
FICHA TÉCNICA
4) CATALUÑA: Alazne Llaó, Aroa González, Rut Salva, Nora Pérez, Martina Álvarez, Imane Mouhal, Aina Mata, Sira Siñol, Amparo Cuñat, Anna Garcia, Victòria Ramírez e Ona Fernández.
3) GALICIA: Estela Fernández, Daniela Rodríguez, Andrea Dapia, Ángela Blanco, Emma Gandoy, Sara Couso, Candela Fernández, Lara Nieto, Lia Ayestarán, Nuria Pascual, Lola Muñoz e Anxela Fernández.
GOLES: 1-0 Amparo Cuñat (2′). 1-1 Sara Couso (7′). 2-1 Martina Álvarez (28′). 2-2 Sara Couso (29′). 3-2 Aroa González (32′). 3-3 Sara Couso (35′). 4-3 Amparo Cuñat (35′).
EQUIPO ARBITRAL: Ivette Agell e Maribel Sepúlveda. Asistente: Sònia Aguilar.
INCIDENCIAS: Partido final do Campionato de España de Seleccións Autonómicas (CESA) infantil feminino de fútbol sala disputado no Pavillón de Salou.
Consulta aquí todos os resultados do CESA2022 futsal
💙💙💙
🤝 Felicitats, @FCF_CAT
🙏 GRAZAS a todas as familias que arrouparon ÁS NOSAS en Salou e boa viaxe de volta#SentindoGalicia pic.twitter.com/j7dvgmtHyJ
— RFGF (@futgal) April 15, 2022
