A Selección Galega Sub-15 alcanzou a gloria tras clasificarse para a gran final do Campionato de España de Seleccións Autonómicas (CESA) tras eliminar á potente Madrid na quenda de penaltis e tras un partido non apto para corazóns febles. Histórico, extraordinario e marabilloso. A Selección de Galicia Sub-15, que adestra Vicky Vázquez, xa está entre as máis grandes de España.
A semifinal non defraudou. O guión foi o esperado, cunha selección madrileña protagonista con pelota e unha Galicia esperando a súa oportunidade. Houbo moito respecto nos primeiros compases, pero o choque foise rompendo co paso dos minutos e coa acumulación da fatiga.
As máis claras foron para Madrid, que se chegou a atopar ata en tres ocasiones coa madeira da meta defendida por Naiara, a última vez co empate no marcador e no engadido. Co resultado inicial chegouse ao descanso en Cartagena.
Tras o paso polos vestiarios continuou o a festa do fútbol feminino. Madrid foi arriba con todo, pero atopouse co muro galego e cos postes. Con todo, as madrileñas lograron poñerse por diante no minuto 65 grazas a un tanto de María Valladolid.
Galicia, lonxe de tirar a toalla, esperou a súa oportunidade e tívoa cinco minutos máis tarde nunha rápida transición que acabou co de Luíta no segundo pau.
Na recta final, a semifinal converteuse nun correrrúas e Galicia sufriu o asedio madrileño. Con todo, co empate chegouse ao final do encontro.
Na quenda de penaltis, Madrid botou unha pelota fóra e as nosas executaron todos os lanzamentos á perfección. Minerva anotou o definitivo e estalou a festa galega.
Andalucía será a rival de Galicia na final
O rival da Selección de Galicia Sub-15 na gran final será Andalucía. O combinado andaluz eliminou na outra semifinal a Cataluña tamén na quenda de penaltis. A última batalla polo título nacional terá lugar hoxe mércores 8 de xuño a partir das 9.30 horas.
FICHA TÉCNICA
1) MADRID: Laia; Silvia, Amaya, Claudia, Adriana, Iris Ashey, Paula, Raquel, Elsa, Irune e Enma. Tamén xogaron Silvia, María Valladolid, Marta e Alejandra.
1) GALICIA: Naiara; Sara Cuiñas, Noa, Elena, Sara Couso, Abril, Luci, Nara, Laurita, Luíta e Ana Capelo. Tamén xogaron Luchi e Minerva.
GOLES: 1-0 María Valladolid (min. 65). 1-1 Luíta (min. 70).
EQUIPO ARBITRAL: Alejandro Ojaos Valera.
INCIDENCIAS: Semifinal do Campionato de España de Seleccións Autonómicas disputado no San Juan Bosco Los Dolores (Cartagena).
