Magnífica actuación da selección de Galicia no Campionato de España sub 21 de taekwondo, que se disputou onte na Nucia (Alacante.: Galicia logrou a primeira posición na clasificación por equipos da categoría feminina, o terceiro posto na masculina e o segundo na clasificación xeral.
En total as e os deportistas galegos acadaron tres ouros, tres pratas e oito bronces, sendo dous ouros, dúas pratas e tres bronces das deportistas femininas.
Duelos entre galegas
En -62 quilogramos houbo unha interesantísima final galega. Cloe Iglesias (Patiño) acadou o ouro tras vencer en cinco combates. A galega comezou a súa competición ante Laura Casado (Castela e León) e venceu de forma contundente (22-2).
A continuación superou a Aiza Sissoko (Baleares) por 3-9 e nos cuartos tivo o combate máis duro ante Neus Valbuena (Comunidade Valenciana), á que venceu no punto de ouro (0-2). Na semifinal a galega tivo como rival a Irati Irigoyen (Federación Navarra) e novamente Cloe Iglesias logrou un cómodo triunfo (7-15).
E para rematar, a gran final, na que a xoven deportista do Patiño se enfrontou a outra brava galega, Irene Montemuiño (Natural Sport Riveira). Foi un combate de moita tensión e moi axustado, no que ambas amosaron que se coñecen moi ben e finalmente o título de campioa foi para Cloe por so un punto de diferenza.
Con respecto a Irene sinalar que comezou a competición gañando a Malen Montero (Castela e León) por 3-23 e posteriormente superou a Ariadna Arrondo (Navarra) por 9-13, nun combate duro no que sempre levou a iniciativa a nosa taekwondista.
Nos cuartos de final enfrontouse á catalá Julia Fernández e a deportista do Natural venceu por 12-8 con moi boas sensacións. Xa na semifinal, outra Navarra como rival, nesta oportunidade era Maialen Carvalho e triunfo contundente para a nosa deportista que comezou moi forte e logrou escaparse no marcador e despois manter a distancia (20-12).
Ver esta publicación en Instagram
Así chegou unha das dúas finais galegas, porque en +73 tamén tivemos final galega, onde Tania Castiñeira (Hebe) foi ouro por tercer ano consecutivo, e a súa compañeira de selección Desiree Rivadulla (Suh Boiro) logrou a prata.
Tania comezou o Campionato ante Verónica Placeres (Canarias), que cando ía perdendo por 7-0 decidiu retirarse. En semifinais enfrontouse á vasca Soraya Martín e novo triunfo da galega (5-2). E na final tiña como rival a Desiree Rivadulla e Tania logrou facerse co título por 7-4, nun combate no que levou a iniciativa.
Rivadulla, polo outro lado do cadro, comezou o torneo cunha cómoda vitoria ante Yasmina Deniz (Andalucía) e na semifinal volveu ser moi superior a Silvia Boix (Cataluña), a que venceu por 1-10. No último combate, loita entre taekwondistas de Galicia e reparto de medallas entre dúas campioas.
Os bronces do taekwondo de Galicia
Os bronces de Galicia en categoría feminina foron para Arlet Ortiz (-57, Mat´s), Alma Pérez (-53, Suh Sport) e María González (-49, Couto).
Arlet superou no primeiro combate a Arene Rementería (Castela e León) por 18-11 e en cuartos a Alison Forgan (Navarra), nunha dura loita que caeu a favor da galega. Na semifinal, Arlet enfrontouse á valenciana Anastasia Ignatyev e, novamente nun axustado combate, o triunfo foi para a valenciana (11-13), que finalmente proclamouse campioa de España.
Pola súa banda, Alma gañou no primeiro combate a Carolina Arco (Andalucía) de forma contundente (8-28) e nos cuartos a Paula Termina (Valencia), pero caeu en semifinais ante Nerea Fernández (Madrid).
Finalmente, María González gañou a Andrea Rodríguez (Asturias) e a Sara Núñez (Andalucía), esta última no punto de ouro. Así logrou o bronce. Na semifinal cruzouse con Adriana Cerezo, a xoven deportista que vai representar a España nos Xogos Olímpicos de Toquio e que está imparable, e non puido coa actual campioa de España.
