- A Xunta de Galicia vén de pór en marcha unha nova páxina web www.galiciaolimpica.gal, que contén información sobre as e os deportistas galegos nos Xogos Olímpicos.
- O site informará tamén do deporte paraolímpico galego.
- Ademais do calendario das e dos deportistas galegos con todos os detalles das probas nas que compiten, o espazo web tamén informa sobre os seus resultados.
A Secretaría Xeral para o Deporte mantén activa dende o inicio dos Xogos Olímpicos de Toquio a nova website ‘Galicia Olímpica’ (galiciaolimpica.gal) na que se vai ir recollendo toda a información sobre os 21 deportistas olímpicos (mais outros cinco con licenza galega) e 14 paralímpicos (máis dous guías) galegos que participan nestas datas na celebración dos Xogos Olímpicos e Paralímpicos de Tokyo 2020.
Ademais do calendario das e dos deportistas galegos con todos os detalles das probas nas que compiten, o espazo web tamén informa sobre os seus resultados.
Entrevistas ás protagonistas en ‘Galicia Olímpica’
Do mesmo xeito, o espazo dixital contén extensas entrevistas personalizadas para coñecer máis a fondo aos deportistas que compiten baixo a bandeira de Galicia. Así xa están accesibles as entrevistas a deportistas como Teresa Portela, María Bernabéu, Alicia Fernández ou Julia Benedetti.
A nova páxina web nace da colaboración entre a Consellería de Emprego e Igualdade e a Secretaría Xeral para o Deporte que ademais, axudan aos deportistas clasificados para os Xogos coas ‘Axudas Reto Galicia Tokyo con Igualdade 2021’ que achegan aos competidores galegos un total de 300.000 euros e das que xa se vén de publicar a súa primeira resolución. Deste xeito, todos os deportistas galegos clasificados levarán aos Xogos Olímpicos de Tokyo 2020 a campaña ‘NON contra a violencia de xénero’.
En verbas do secretario xeral para o Deporte, José Ramón Lete Lasa, a alegría do esforzo do olimpismo “é a que senten todos os integrantes da delegación galega que nos representará en Toquio. Unha alegría do esforzo implementada ao longo dos últimos cinco anos, nos que tiveron que resistir, ademais dunha pandemia, o adiamento duns Xogos Olímpicos e a pantasma da súa cancelación”.
