- As seleccións galegas de Combate e de Técnica de taekwondo participarán esta fin de semana no Campionato de España en La Nucia representando a Galicia.
Esta fin de semana (18 e 19 de febreiro) celebrarase en La Nucía (Alacante) o Campionato de España absoluto de combate, o das diferentes categorías de técnica e freestyle e o de parataekwondo. O equipo galego está formado por deportistas xa consagrados, pero tamén conta con taekwondistas moi novos que renderon a un nivel espectacular nas categorías inferiores. Na expedición galega, formada por máis de 100 persoas, tamén hai que destacar a presenza de 6 árbitros/as e 14 adestradores/as.
Campionato de España de Técnica de taekwondo
Dispútase o sábado 18 de febreiro (técnica) e o domingo 19 de febreiro (parellas e tríos en técnica e freestyle) coa participación de case 60 taekwondistas galegos, que tratarán de manterse no máis alto. Ademais este ano o torneo conta cunha altísima participación.
No campionato de España de taekwondo do pasado ano, celebrado tamén en La Nucía, a Federación Galega de Taekwondo logrou o primeiro posto na clasificación xeral por equipos tanto en técnica como en freestyle e as e os nosos deportistas tratarán de revalidar o título.
Hai na lista deportistas de clubs como: TKD Sada, Han´s Horang I Natural Ribeira, Neka, Yidam, Hebe, Kiap, Tao, Escola Lucense, Seungsport, Couto ou Omnihum.
Tamén se celebrará o Campionato de España de parataekwondo e a Federación Galega de Taekwondo tamén leva á súa selección, formada por catro deportistas e unha técnica.
Galicia, no Campionato de España de Combate
O sábado 18 celebrarase o Campionato de España de Combate Sénior, coa participación de 26 deportistas (14 mulleres e 12 homes).
Entre os convocados, destaca a ausencia de Iván García, por lesión. Iso si, defenderán o título dos anos 2021 e 22 Arlet Ortiz e Tania Castiñeira e tamén contaremos con taekwondistas tan destacados/as como Sara Cortegoso, Alma Pérez, Pablo Patiño, Ainoha García, Miryam García ou Dessi Rivadulla. Ademais destaca a incorporación de taekwondistas moi novos como Javi Otero, Helena García, Adrián Salanova ou Sergio Troitiño, entre outros.
O pasado ano 2022, Arlet Ortiz (-57 Mat´s), Tania Castiñeira (+73, Hebe) e Iván García (+87, Mat´s) lograron o ouro no Campionato de España celebrado en La Nucía.
Ademais, nesa ocasión, Galicia sumou dúas pratas (Alma Pérez e Ainoha García) e 6 bronces (Pablo Patiño, José Fernández Rey, Aitana Fariña, Miryam García, Cloe Iglesias e Desireé Rivadulla). Con estas medallas, Galicia logrou a segunda posición na clasificación xeral por equipos femininos, mentres que foi cuarta na clasificación masculina e na xeral.
Na lista figuran deportistas de clubs como: Kae Sport, Suh Sport, Maniotas – Noia, Tao, Taekanart, Patiño, Mace Sport, Natural Sport Riveira, Tao, Hebe, Mat´s, Garrapucho, Couto ou Dobok.
