Fantástico balance polo momento da representación galega no 15º Campionato de Europa de Poomsae e Freestyle, que se está a celebrar en Seixal (Portugal), segundo informa a Federación galega de Taekwondo.
Recompilando a participación feminina cabe salientar as seguintes medallas: Laura Álvarez (Neka) foi subcampioa de Europa Junior; a parella integrada por Laura Álvarez e Daniel Areán (Neka) fíxose coa medalla de prata en técnica junior; Celia García (Tao) foi bronce en freestyle +18 anos ao igual que Esperanza Fernández (Couto) que obtivo o bronce na categoría máster 2 modalidade de técnica, e Irea Abuín (TKD Sada) en -17 anos freestyle.
O trío formado por Alejandro Losada Rodríguez (Neka), Carlos Rey (Neka) e Álvaro Portela (Hebe) proclamouse campión de Europa en trío 1. Esta foi a mellor noticia que chegou de Seixal (Portugal), pero non a única. Tamén temos a dous subcampións de Europa júnior (Laura Álvarez, do Neka, e Tomás Fernández, do Tao) e o bronce de Esperanza Fernández (Couto) en máster 2 en técnica. En freestyle, Celia García (Tao) logrou a medalla de bronce en +18 anos.
Na competición de técnica contouse coa participación de Alejandro Losada García (Tao) en sénior 1 e da parella Laura Álvarez e Daniel Areán (Neka) en júnior. En ambos casos a actuación foi de dez e posiblemente a prata quedase curta.
En sénior 1 había un total de 20 participantes e Alex fixo unha competición incrible. Comezou gañando ao ruso Dmitry Kim na primeira rolda e na segunda eliminou a Benjamin Harder (Dinamarca), número 2 do ranking europeo, asegurando así a medalla. Pero aínda quería máis e logrou superar ao durísimo rival Frans Salmi (Finlandia) para plantarse na final ante o número 1 e defensor do título de campión de Europa, Joel Van
der Weide (Holanda). Aquí, foi mellor o deportista holandés e Alex pechou un torneo excepcional cunha merecidísima medalla de prata.
Os deportistas Laura Álvarez e Daniel Areán, que participaron en parellas júnior, fixeron unha fantástica actuación. Pasaron a final como primeiros, con Alemaña na segunda posición e Italia, na terceira. Na final, o programa foi impecable, de dez, pero nesta ocasión os xuíces decidiron que fora mellor a parella italiana.
Na competición de Freestyle, en -17 anos individual, estivo enorme a representación galega neste Campionato Europeo. Houbo bronce para Irea Abuín (TKD Sada) e prata para Tomás Fernández Herrerín (Tao). Ambos fixeron un traballo excepcional. Tomás Fernández é subcampión de Europa, só por detrás de Ucraína e Irea Abuín quedou na terceira posición, por detrás de Ucraína e Italia.
Nas parellas de + de 18 anos Manuel Alejandro Paz e Bárbara Di Martino (Hebe) lograron a medalla de bronce, empatados a puntos cos segundos. O empate non foi só a puntos, senón tamén nas habilidades técnicas e finalmente tivo que decidirse polas notas máis altas e máis baixas. Sen dúbida, grandísima actuación dos nosos deportistas.
Os taekwondistas galegos Alejandro Losada Rodríguez (Neka), Carlos Rey (Neka) e Álvaro Portela (Hebe) fixeron un espectacular traballo como trío. Lograron o pase a final como segundo clasificado. Na final, actuación impecable que foi recompensada cun título (adiantaron a Finlandia), que foi celebrado por todo o alto.
Ademais hai que destacar as pratas na categoría júnior de Laura Álvarez (Neka) e Tomás Fernández (Tao). Ambos fixeron un traballo impecable que merecía premio. Tomás entrou na final coa mellor puntuación, pero despois os xuíces decidiron que Dinamarca adiantaba ao noso deportista.
Medallas de bronce
Na categoría feminina, tamén gañou Dinamarca, por diante da nosa Laura Álvarez, enorme na súa execución.
Despois foi a quenda para Esperanza Fernández (Couto) en máster 2, que logrou a medalla de bronce coa ilusión de sempre. Por diante tivo a Francia (1º) e Alemaña (2º).
Na competición de freestyle, onde tivemos unha medalla (Celia García) e algunhas decepcións, xa que o traballo desenvolvido non se veu recompensado na puntuación. A viguesa Celia García (Tao) logrou a medalla de bronce na categoría de + de 18 anos feminino, nunha proba que foi dominada por Dinamarca, que logrou a medalla de ouro.
