- Futbolistas do equipo cadete do Erin Go Bragh de Dublín visitarán a Gaélico Escola PuntoGal do C.P.I. Plurilingüe Antonio Orza Couto do Forte (Boqueixón) e compartirán vivencias cos/as futbolistas galegos unindo así culturas celtas na Celtic Week
O tempo de Samaín en Galicia (Samhain en Irlanda) semella un fantástico momento para un intercambio de experiencias entre mocidade galega e irlandesa ligadas ambas as dúas polo mundo celta. Con ese espírito de convivencia e coñecemento mutuo ponse en marcha na última semana deste mes a Celtic Week da man da Asociación Galega de Fútbol Gaélico (AGFG). “Trátase dunha primeira experiencia que pretende, como a Celtic Cup dos adultos, ir crecendo co paso dos anos”, apunta Alexandre Sanmartín ‘Jano‘, coordinador xeral das ‘Gaélico Escolas PuntoGal’ da AGFG.
Como non podía ser doutro xeito, ademais de visitas culturais, neste intercambio de experiencias non vai faltar a práctica do fútbol gaélico nestas datas de convivencia e unión entre culturas celtas con rapazada de Irlanda e Galicia como protagonistas.
Actividades da Celtic Week
Nesa primeira edición da Celtic Week o equipo cadete do club irlandés Erin Go Bragh radicado en Dublín visitará Galicia durante a última semana do mes de outubro. Na expedición acudirán unhas 20 rapazas de entre 14-15 anos. Neses días compartirán experiencias coa mocidade da Gaélico Escola PuntoGal de Boqueixón, en concreto do C.P.I. Plurilingüe Antonio Orza Couto, en O Forte. Está prevista a súa estancia en Galicia desde o 28 de outubro ata o 31 de outubro, data na que regresarán a Irlanda.
Partido cun terceiro tempo en forma de magosto
O programa de actividades inclúe, entre doutras, unha visita a Compostela o martes 29 de outubro na que pasarán polo Camiño de Santiago. O mércores 30 acudirán ao Museo do Pobo Galego e posteriormente ese mesmo día chegará o tempo para o fútbol gaélico. A partir das 15:30 horas e aproximadamente ata as 18:00 horas xogarán un amigable co alumnado do C.P.I. Plurilingüe Antonio Orza Couto que está en O Forte (Boqueixón). No terceiro tempo deste encontro, un momento imprescindible no fútbol gaélico, está previsto que se leve a cabo un magosto, unha das festas gastronómicas galegas ligada a estas datas.
Alexandre Sanmartín ‘Jano’, coordinador xeral das ‘Gaélico Escolas PuntoGal’ da AGFG: “Trátase dunha primeira experiencia que pretende, como a Celtic Cup dos adultos, ir crecendo co paso dos anos”
O xoves 31 o programa desta Celtic Week ten prevista a visita das xogadoras do club irlandés Erin Go Bragh ao Aquarium Finisterrae da Coruña, un dos museos científicos coruñeses que, neste caso, dedícase a educación ambiental e á divulgación científica dos temas mariños.
Así neste final de outubro Galicia acollerá un achegamento entre o futuro do fútbol gaélico galego e o irlandés, e tamén entre da cultura que temos en común dous lugares ligados ao mundo celta, xusto na semana do Samaín, unha data significativa nesta cultura.
Que é a Asociación Galega de Fútbol Gaélico
A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal garántelle de carácter oficial internacional recoñecido polo máximo órgano, a Gaelic Athletic Asociation (GAA).
Boa parte das actividades da Asociación Galega de Fútbol Gaélico (AGFG) intégranse dentro da RFGF (Real Federación Galega de Fútbol).
PuntoGal é un dos patrocinadores da AGFG que ademais emprega na súa web o dominio www.gaelicogalego.gal.
