Galicia é a actual campioa do Team Relay no Campionato de España XCO/XCE/TR, e desde este venres deberá defender a súa coroa. A Selección Galega acude a Sabiñánigo (Huesca) con doce bikers, tres delas mulleres: Lara Lois, Sofía Álvarez e Laura Mira.
Hai dous anos, as irmandiñas alzábanse como campioas na proba Team Relay, a carreira de remudas por equipos. Despois da pausa no 2020 por mor da pandemia, Galicia porá en xogo a súa coroa no trazado de Santa Lucía cun cuarteto no que competirá Lara Lois, do Extol MTB Team, xunto a Miguel Rodríguez, Andrés Valcárcel e Jorge Punzón.
O circuíto deseñado polo laureado biker galego-catalán José Antonio Hermida ten unha lonxitude de 4,9 quilómetros. Segundo apuntan desde a Federación Galega de Ciclismo, trátase dun percorrido no que a destreza técnica será moi importante e con dureza para marcar diferenzas. O Team Relay arrancará ás 18:00 horas.
O Cross Country Eliminator (XCE) contará con Sofía Álvarez
A tarde do sábado está reservada ao Cross Country Eliminator (XCE), na que tomará parte a ciclista do Cambre CC, Sofía Álvarez.
Dende as 19:00 h a Selección de Galicia presentará nesta explosiva especialidade a outros cinco bikers, que acompañan á galega: Anxo Carril, Andrés Valcárcel, David Fernández, Alberto Pedreira e o vixente subcampión estatal Jorge Punzón.
O XCO reúne a todas as galegas
Finalmente, a participación feminina rematará o domingo, na clausura dos campionatos cun intenso programa de carreiras de XCO.
As categorías femininas do Cross Country Olímpico empezarán a partir das 10:15 horas, con Lara Lois na proba elite e Laura Mira, do Avanza AD, e Sofía Álvarez nas júnior.
