- O DOG recolle a 752 deportistas recoñecidos (283 mulleres e 469 homes) dos que 643 obteñen a cualificación de deportista galego de alto nivel (DGAN). Na comunicación tamén constan as/os deportistas de alto rendemento, rendemento deportivo de base, técnicos, árbitros, xuíces e vitalicios.
O Diario Oficial de Galicia vén de publicar a resolución do 27 de decembro de 2022 pola que se recoñecen as persoas deportistas de alto nivel (DGAN), alto rendemento e rendemento deportivo de base de Galicia e diferentes colectivos deportivos, así como as solicitudes rexeitadas e a causa. En total, das 72 novas solicitudes presentadas, son 66 (o 92%) os recoñecidos, sendo, 40 deportistas de alto nivel, 6 de alto rendemento e 20 de rendemento deportivo de base. Entre estes nomeamentos destacan novos deportistas galegos de alto nivel como a atleta Xela Martínez, o triatleta Antonio Serrat, a judoka Laura Vázquez ou o regatista Martín Wizner Pérez-Lafuente.
Con esta última resolución publicada no DOG a comunidade galega alcanza xa os 752 deportistas recoñecidos (283 mulleres e 469 homes), divididos en 643 de alto nivel (238 mulleres e 405 homes) DGAN, 35 de alto rendemento (13 mulleres e 22 homes), 48 de rendemento deportivo de base (22 mulleres e 22 homes), 12 técnicos (1 muller e 11 homes), 3 árbitros (3 homes), 4 xuíces (3 mulleres e 1 home) e 7 vitalicios (3 mulleres e 4 .
Entre os 752 deportistas recoñecidos, cómpre salientar un total de 22 deportistas con diversidade funcional (8 mulleres e 14 homes) que representan o número máis alto da serie histórica. Con todo, Galicia acada con esta resolución o seu récord de deportistas recoñecidos en todas as categorías e tamén de deportistas galegos de alto nivel.
Na lista de mulleres que pasan a obter o recoñecemento por parte da Xunta de Galicia de deportistas galegas de alto nivel DGAN (indicamos nome e modalidade), hai preto de 20 deportistas de ata 10 disciplinas diferentes. Nesa relación aparecen deportistas de modalidades deportivas como o fútbol sala, atletismo, vela, piragüismo, tiro olímpico, remo, loita, taekwondo, judo, así como salvamento e socorrismo.
Lista de novas DGAN (indicamos nome e modalidade)
- Carolina Agulla – Fútbol sala
- Elsa Cabezas – Salvamento e socorrismo
- Carmela Cardama – Atletismo
- Ánxela Fontán – Piragüismo
- Paula Cristina González – Vela
- Míriam González – Vela
- Ana López – Tiro olímpico
- Candela Martínez – Remo
- Xela Martínez – Atletismo
- Rocío Paz – Piragüismo
- Blanca Piñeiro – Piragüismo
- Cristina Rodríguez – Loita e D.A.
- Sara Soneira – Taekwondo
- Aroa Suárez – Salvamento e socorrismo
- Helena Torreiro – Salvamento e socorrismo
- Lara Casilda Torreiro – Salvamento e socorrismo
- Laura Vázquez – Judo e D.A.
Cómpre lembrar que o novo decreto de alto nivel, de alto rendemento e de rendemento deportivo de base publicado polo DOG o pasado 29 de setembro de 2020, recoñece novas figuras como o alto rendemento deportivo (práctica deportiva que aínda non pode ser cualificada de alto nivel pero cuxa proxección indica que estará en condicións de selo) e o rendemento deportivo de base (etapa de desenvolvemento e perfeccionamento previa a acadar o alto rendemento deportivo ou o alto nivel).
O mesmo ocorre coas categorías de técnicos – adestradores e xuíces – árbitros, novos colectivos que se incorporan a figura do alto nivel, a través da Comisión Galega de Avaliación do Alto nivel deportivo.
