- Lete Lasa orienta o esforzo das institucións e federacións cara a tecnificación deste deporte en Galicia para acadar representación olímpica para os vindeiros Xogos que terán en lugar en París no ano 2024.
- Nava Castro destaca a iniciativa Galicia surfing, unha oferta de turismo activo e sustentable para os 1.500 quilómetros da costa galega posta en marcha hai uns anos que xa se constituiu coma o primeiro produto turístico relacionado con esta modalidade deportiva en todo o territorio galego.
O secretario xeral para o Deporte, José Ramón Lete Lasa e a directora de Turismo de Galicia, Nava Castro, participaron na presentación do Campionato de España de Surfing 2021 que terá lugar ata o 5 de setembro na praia da Frouxeia, en Valdoviño. Este é o segundo ano consecutivo no que Valdoviño acolle o Campionato de España que rematará a fin de semana que vén co Campionato de España por comunidades autónomas do que Galicia foi campioa en 2018 e 2019.
O mandatario galego destacou a importancia de Galicia como capital nacional e mesmo internacional desta disciplina, subliñando que tanto a federación galega, a federación española e a delegación nacional da World Surf League teñen as súas sedes en Galicia.
Do mesmo xeito tamén resaltoua importancia dos principais eventos desta modalidade que se celebran en Galicia como o Pantín Classic, o Junior Qualifying Series 1.000 Gadis Pro Ferrol ou o propio Campionato de España de Surfing. Ademais, Lete Lasa puxo o acento nos deportistas galegos de surf que levan acadando grandes resultados nos últimos anos.
Neste sentido apuntou cara os nomes de pioneiros como Gony Zubizarreta ou Vicente Romero e tamén a outros que seguen o seu camiño como Esperanza Barreras, bicampioa mundial de SUP e que está piques de conseguir o cetro europeo da especialidade.
O surf será olímpico en Paris 2024
Por último, o secretario xeral informou que o esforzo das institucións e federacións debe orientarse cara a tecnificación deste deporte en Galicia para acadar representación olímpica para os vindeiros Xogos que terán en lugar en París no ano 2024.
Lete Lasa lembra que nos Xogos Olímpicos de París 2024 esta modalidade deportiva vencellada ao mar vai ser olímpica, o que fai aínda máis importante o esforzo das institucións e federacións de cara á tecnificación deste deporte en Galicia
Pola súa parte, a directora de Turismo de Galicia, Nava Castro, referiuse ao labor que ven desenvolvendo desde hai anos a Xunta a prol da consolidación de Galicia coma destino turístico no eido do surf, tanto na identificación e promoción dos lugares máis idóneos para a súa práctica, “como no apoio á creación de infraestruturas e á organización de acontecementos que nos prestixien nos ámbitos nacional e internacional”.
Nava Castro, directora de Turismo de Galicia salienta a consolidación da nosa comunidade como destino turístico ligado a esta modalidade deportiva e o “apoio á creación de infraestruturas e á organización de acontecementos que nos prestixien nos ámbitos nacional e internacional”
Así, destacou a iniciativa Galicia surfing, unha oferta de turismo activo e sustentable para os 1.500 quilómetros da costa galega posto en marcha hai uns anos que xa se constituiu coma o primeiro produto turístico relacionado con esta modalidade deportiva en todo o territorio galego, dispoñible os 365 días do ano e adaptado a todos os niveis e perfís de surfistas, e a colaboración desde o Goberno galego coa celebración da proba Abanca Pantin Classic Galicia Pro, que anto tras ano logra focalizar cara a Galicia a atención dos surfistas de todo o mundo.
