Galicia perde a súa coroa do Campionato de España de Seleccións Autonómicas 7s senior. A Selección irmandiña caeu na final ante o País Vasco, nun emocionante partido que rematou nun 12-10.
As xogadoras da Selección Galega chegaran á loita polo campionato despois dun pleno de vitorias ante Andalucía, Asturias e o propio País Vasco.
Porén, as vascas deron a sorpresa no último partido da competición, que se disputou nunha única xornada.
Duelo igualado ata o último momento entre Galicia e Euskadi
Nos primeiros compases do partido, prevíase un duelo igualado, pero as galegas dominaban o ritmo. Alevín encargouse de abrir a lata, cun ensaio nos primeiros minutos de xogo.
Pouco despois, Ana Herrán puxo táboas no marcador, cun try para a Selección Vasca, a menos de dous minutos para o tempo de descanso.
A segunda metade chegou con todo en xogo, e Elsa Porto volveu a adiantar ás galegas, deixando un luminoso que informaba do 10-7.
Todo parecía indicar que o triunfo sería para Galicia, pero as vascas presionaron ata anotar un ensaio da man de Amaiu Mayo, que deu a volta ao marcador, colocando o 10-12.
A Selección de Galicia xa non tivo máis opcións, e tras un duro encontro, quedou subcampioa do CESA 7s, coas vascas como vencedoras do torneo.
A terceira posición foi para o equipo andaluz, despois de vencer ás asturianas por un 27-0 no encontro para decidir o terceiro e cuarto posto.
