Esta tarde, ás 17:00 h, tivo lugar na Casa do Deporte de Vigo a presentación oficial do Top 8, a Fase Final do Campionato de España de Balonmán en categoría infantil feminina, que se celebrará do 29 de maio ao 1 de xuño nas localidades pontevedresas de Redondela e Bueu.
O acto contou coa presenza do secretario Xeral para o Deporte da Xunta de Galicia, José Ramón Lete Lasa, da vicepresidenta Segunda e Deputada de Deportes, Economía e Impulso ao Emprego da Deputación de Pontevedra, Luisa Sánchez, da alcaldesa de Redondela, Digna Rivas, do concelleiro de Deportes de Bueu, Ricardo Verde, así como do presidente da Federación Galega de Balonmán, Bruno López, do presidente do Bueu Atlético Balonmán, Manuel Castro, e do presidente da Sociedade Atlética Redondela, Lito Krook.
Tamén acudiron os dous equipos galegos clasificados para esta fase final, oLapamán Área de Servizo Bueu Atl. Balonmán e a SAR Rodavigo, acompañados polas súas familias e membros das súas directivas.
O campionato reunirá aos oito mellores equipos de España na categoría infantil feminina:
- Handbol Gavà Blau
- Eskubaloia Basauri
- Atticgo Bm Elche
- Fundació Handbol Sant Vicenç
- IFEM CBM
- AEH Les Franqueses
- Lapamán Área de Servizo Bueu Atl. Balonmán
- SAR Rodavigo
O Campionato de España de Balonmán en categoría infantil feminina regresa a Galicia tras a edición de 2022, organizada polo Club Balonmán Cangas e a A.D. Carballal. Nesta ocasión, é froito da colaboración entre a Federación Galega de Balonmán, os clubs Bueu Atlético Balonmán e Sociedade Atlética Redondela, e o apoio institucional da secretaría Xeral para o Deporte, da deputación de Pontevedra e dos concellos de Bueu e Redondela.
Durante as intervencións, as autoridades destacaron o orgullo de contar con dous representantes galegos nesta fase final, o enorme esforzo realizado por xogadoras, técnicos e familias ao longo da tempada, e a importancia da cooperación entre administracións públicas e clubs para facer posible este evento de primeiro nivel en Galicia.
Durante a presentación desta fase final do Campionato de España infantil feminino, José Ramón Lete Lasa asegurou que dende mañá mesmo ata o vindeiro domingo, Bueu e Redondela converteranse no epicentro estatal da base desta modalidade deportiva e desexou sorte a todos os equipos participantes: Handbol Gavá Blau, AEH Les Franqueses e Fundació Handbol Sant Vicenç de Cataluña; Eskubaloia Basauri de Euskadi; Ifem CBM de Andalucía; Atticgo BM Elche da Comunidade Valenciana; e, especialmente, aos dous equipos galegos, o SAR Rodavigo de Redondela e o Lapamán Área de Servicio Bueu Atlético BM, indicando que “xa é todo un éxito que xoguen esta fase final entre as mellores do país”.
Guardés e Porriño, dous exemplos para a base do balonmán
Para todas as rapazas asistentes á presentación, o secretario Xeral para o Deporte da Xunta de Galicia puxo como exemplo os dous equipos galegos da Liga Guerreras Iberdrola, o Mecalia Atlético Guardés e o Conservas Orbe Zendal Porriño BM, dous equipos de “absoluta moda” que xogaron a final da Copa Europea de Balonmán EHF en 2023 e 2025.
Lete Lasa: “O deporte feminino galego está medrando exponencialmente nos últimos anos polo que podedes poñeros metas tan ambiciosas como desexedes, porque as mulleres estades conquistando lugares aos que nunca antes se tiña chegado”
No caso do Porriño que vén de acadar ese subcampionato tras eliminar a cinco equipos de cinco países diferentes, José Ramón Lete Lasa destacou ás xogadoras que se formaron na base galega como Sarai Sanmartín, Alicia Campo, Aitana Santomé, Iria Benaches, Aroa Fernández, Marta Martínez ou Andrea Fernández. “O deporte feminino galego está medrando exponencialmente nos últimos anos polo que podedes poñeros metas tan ambiciosas como desexedes, porque as mulleres estades conquistando lugares aos que nunca antes se tiña chegado”, sentenciou.
O mandatario galego destacou a importancia da base e, nomeadamente, nesta modalidade deportiva que é a terceira federación con máis rapaces e rapazas de entre 6 e 16 anos, tan só por detrás de fútbol e baloncesto, estando estas tres entidades federativas adheridas ao Programa Xogade da Xunta de Galicia.
