O vindeiro sábado, 1 de maio, San Agustín de Guadalix (Madrid) será a sede do Campionato de España júnior de Loitas Olímpicas. A este torneo acude unha expedición galega formada por catro árbitros, seis técnicos e vinte deportistas. Deles, catro son loitadoras, ás que se suma nesta ocasión Nerea Pampín que acudirá como técnica.
Segundo informa Fegaloita, dentro da loita libre feminina, Aimara Osco, do Ciudad de Vigo, competirá en 59 kg. No peso de 65 kg estará Andrea Castro, do Atila, e en 50 kg estará a súa compañeira de club, Raquel Bravo. Finalmente, Luana Raquel, do El Castro, participará en 57 kg.
Nerea Pampín acudirá ao europeo sub23 en maio
A este torneo júnior acudirá tamén Nerea Pampín, do Club Keltoi, pero o fará en calidade de técnica, a única muller dentro do corpo de adestradores.
Máis adiante, no mes de maio, a loitadora representará a España no Campionato de Europa sub23, que terá lugar entre o día 19 e o 23 en Skopje, Macedonia.
