A Selección Española de Fútbol Praia, coas galegas Andrea Mirón, Carol González e Sara Tui, xa se atopa concentrada en Rusia para afrontar o emocionante reto de disputar a primeira edición da Intercontinental Beach Soccer Cup.
Segundo informa a Real Federación Galega de Fútbol, o equipo, que chegou a Rusia durante a tarde do mércores 11 de agosto, exercitarase este xoves para chegar preparado ao debut ante Brasil, que se producirá o vindeiro venres 13 de agosto.
Os próximos partidos de fútbol praia disputaranse os días 14 e 15 do mesmo mes e enfrontarán a España contra Rusia e Estados Unidos nesta orde.
O torneo terá formato de liguiña e o equipo que máis puntos sume proclamarase o campión da primeira edición do prestixioso campionato.
Todos os partidos da competición de fútbol praia poderanse seguir por streaming a través das canles oficiais da Selección Española de Fútbol.
