A terceira edición do GP Pontevedra de ciclismo tivo nas corredoras galegas a algunhas das principais protagonistas en dúas das tres carreiras celebradas este domingo para esta cita coa dúas rodas en estrada.
Lorena Patiño (XSM) rozou a vitoria na competición cadete ao igual que a súa compañeira de equipo María Filgueiras na proba júnior, unha quenda na que Marina González (Illas Cíes) acadou o triunfo entre as máster-40, tal e como recolle a Federación Ciclismo Galego.
Foi unha carreira disputada sobre un percorrido chan que ía case todo pegado á Ría de Pontevedra sobre un circuíto que de idas e voltas pola autovía que comunica Marín coa Cidade do Lérez. Na parte final o recorrido estirábase coa subida á Porteliña un porto non moi longo pero con boas rampas para marcar o desenlace da carreira.
A francesa Cécile Lejeune (Massi Tactic), gañadora elite-Sub23, coroouse como a gran raíña da terceira xornada da Copa de España feminina Cofidis.
A Avenida das Corvaceiras acolleu a saída e a chegada do evento organizado por Noko 360 Sports e que volveu ter o Alto da Porteliña como xuíz principal. As primeiras que o ascenderon foron as cadetes, unha carreira disputada sobre 44 quilómetros e na que dúas ciclistas da nosa comunidade remataron entre as cinco primeiras. A ciclista marinense Lorena Patiño xogouse a vitoria na recta final nun man a man coa navarra Paula Ostiz (Nafarroa), que mantivo a súa condición de líder invicta na Copa de España.
A 14 segundos do dúo de cabeza chegaron tres corredoras con Alejandra Neira (Cambre Caeiro) facendo quinta e sumando 41 puntos que lle permiten subir un posto na xeral para colocarse terceira, dúas posicións por diante de Lorena Patiño.
María Filgueiras, segunda entre as Junior no GP Pontevedra
O XSM de Marín, nunha proba que transitaba polo seu concello, tamén soñou co triunfo ata os últimos metros con María Filgueiras nas juniors. A ciclista de Miño, vencedora o domingo anterior en Beasain, abriu oco xunto á líder Ayala Serrano (Zu-K), pero unha caída na última curva impediulle esprintar coa vasca no desenlace dos 65,4 km de percorrido. A corredora galega refíxose a tempo para obter a segunda praza, mesmo posto que agora ocupa na xeral.
A 5″ de María Filgueiras cruzou a liña de meta un grupo de 18 unidades. Neste reducido pelotón Andrea Prado (CCB Becani) conseguiu a oitava posición, entrando esta vez a súa compañeira de club, Xiana Camiña, no posto 22º.
Desde un principio as corredoras do CCB-Becani buscaron rodar en postos de cabeza e ben colocadas, traballo incrible o de Sara Veiga que ata a base do porto estivo sempre pendente de levar ás súas compañeiras a cabeza de pelotón, baleirándose por completo e deixándose ir xa neses últimos 10 km.
Unha caída a metade de carreira deixaba un pouco descolocadas a Uxía Gómez, Lucía Ballester e Laura Anes, quedándose en posicións de arriba Andrea Prado e Xiana Camiña, que encaraban as primeiras ramplas do porto moi ben colocadas.
Andrea Prado encaraba esa subida nos postos controlando sempre aos seus rivais e cedendo só 20 segundos co grupo de 4 corredoras que coroaban, Xiana Camiña, nun segundo grupo quedaba a pouco máis de 30 segundos da cabeza de pelotón.
Formábanse así 3 grupos con 4 corredoras por diante, un segundo grupo no que rodaba Andrea Prado e un terceiro grupo no que se colocaba Xiana Camiña, as corredoras do Betanzos lideraban moi ben os seus grupos entrando Andrea Prado nunha meritoria 8ª posición e Xiana Camiña no posto 22, levándose o sprint do grupo no que ela entraba.
Segundo relatan desde o CCB-Becani “por atrás unha avaría obrigaba a Uxía Gómez a cambiar de bici. Na subida ao porto o ir tan atras lastrábaas moito encarando os últimos 5 km as tres xuntas, nese momento unha fochanca que non vía Laura tirábaa ao chan nunha dura caída na que a súa bici sufria varias danos, obrigándoa a cambiar de montura, a dureza da caída non amedrentaba nada á corredora lucense que chegaba a meta coa camisola rota e unha fenda no casco”.
“As seis corredoras do CCB-Becani lograban entrar dentro do control de peche da proba, logrando o obxectivo marcado desde un principio, seguir sumando puntos para o equipo e collendo experiencia nunha competición de moito nivel”, explican con satisfacción desde o club betanceiro.
Outra galega nesta carreira foi Fabiola Salgado Lago do LYNALFA- C.C. Ponteareas que finalizou no posto 56º.
Éxitos das ciclistas máster galegas
Dúas máster-40 dilucidaron a vitoria no seu grupo de idade. A pugna non puido estar máis emocionante. Marina González entrou a décimo cuarta e a canaria Montserrat Pereira (Arrival Tenerife), a decimoquinta. Deste xeito, a verinense residente en Vigo debutou nesta edición da Copa de España feminina Cofidis subindo ao máis alto do podio.
Outras tres masters galegas se clasificaron entre as dez primeiras das súas categorías: sexta Pilar González (Bici O Con) nas 40, e sétima e décima, respectivamente, Iria Nieto (Compostelano) e Judit Jácome (Maese Riders) nas 30.
O Gran Premio Cidade de Pontevedra pechouse coa carreira Elite-Sub23 sobre 99 km. O dobre paso pola Porteliña deixou á fronte a un trío formado por Cecile Pauline e dúas representantes do Laboral Kutxa. Malia a súa inferioridade numérica, a francesa superou a Alba Teruel e a Eneritz Vadillo. Como primeira galega concluíu Irene Trabazo (XSM) na 35ª posicion.
A Copa de España feminina Cofidis tómase agora un respiro e regresará o 22 de abril no municipio leonés de Villaquilambre.
- Máis información do Gran Premio Cidade de Pontevedra
- Páxina da Copa de España – Cofidis
- Clasificación GP Pontevedra – Élite
- Clasificacións GP Pontevedra – Junior e máster
- Clasificación GP Pontevedra – Cadete
